کوالالمپور (نیوزڈیسک) امریکی صدر کے ایشیائی ممالک کے دورے کے دوران ملائیشیا پہنچنے پر ٹرمپ کے منفرد رقص کی ویڈیو سوشل میڈیا پرٹرینڈنگ میں آگئی۔ تفصیلات کے مطابق امریکی صدر ڈونلڈ ٹرمپ اتوار کی صبح ملائیشیا کے دارالحکومت کوالالمپور پہنچے، یہ ان کے 5 روزہ ایشیائی ممالک کے دورے کا آغاز ہے، صدر کا عہدہ سنبھالنے کے بعد پہلے طویل غیر ملکی دورے میں وہ ملائیشیا سمیت جاپان اور جنوبی کوریا بھی جائیں گے۔
بتایا گیا ہے کہ صدر ٹرمپ نے اپنے ایشیائی دورے کے پہلے مرحلے میں کوالالمپور پہنچنے پر روایتی انداز میں خوش آمدید کہنے والے مقامی فنکاروں کے ساتھ رقص کیا، جس نے اس تقریب کو مزید یادگار بنا دیا جس کی ویڈیو سوشل میڈیا پر تیزی سے وائرل ہورہی ہے، جس میں دیکھا جاسکتا ہے کہ مقامی فنکاروں کی روایتی موسیقی اور رقص دیکھتے ہوئے صدر ٹرمپ بھی اس ڈانس میں شریک ہوگئے اور انہوں نے اپنے مخصوص مکّا لہرانے والے فِسٹ پمپنگ ڈانس سے سب کو حیران کردیا۔


بتایا جارہا ہے کہ دیکھتے ہی دیکھتے یہ منظر سوشل میڈیا کی زینت بن گیا اور رقص کی یہ ویڈیو تیزی سے پھیلنے لگی جس کے نتیجے میں اس کو چند ہی گھنٹوں میں لاکھوں مرتبہ دیکھا گیا، وائٹ ہاؤس نے بھی اپنے سرکاری اکاؤنٹس سے یہ ویڈیو شیئر کی اور ترجمان نے کہا کہ "صدر ٹرمپ کا یہ قدم خوش آمدید کہنے والوں کے لیے نیک خواہشات اور باہمی احترام کا اظہار تھا" جب کہ ویڈیو میں ٹرمپ کے ہمراہ ملائیشیا کے وزیراعظم انور ابراہیم بھی موجود تھے، جو اپنے مہمان کے ساتھ مسکراتے ہوئے موسیقی کے ساتھ ہلکے انداز میں جھومتے نظر آئے۔