اسلام آباد (نیوزڈیسک) پاکستان تحریک انصاف کے وفد کی جمعیت علماء اسلام ف کے سربراہ مولانا فضل الرحمان سے ملاقات ہوئی ہے جس میں محمود خان اچکزئی کی بطور اپوزیشن لیڈر نامزدگی پر اتفاق کیا گیا۔ تفصیلات کے مطابق تحریک انصاف کے وفد نے جے یو آئی کے امیر مولانا فضل الرحمان سے ان کی رہائش گاہ پر ملاقات کی جہاں موجودہ ملکی سیاسی اور خطے کی صورتحال پر گفتگو ہوئی، اس موقع پر خیبرپختونخواہ میں امن وامان کے حوالے سے پی ٹی آئی کی جانب سے قومی جرگہ کے انعقاد کی تجویز پر بھی مولانا فضل الرحمان سے مشاورت کی گئی، جس پر مولانا فضل الرحمان نے قومی جرگہ کی تجویز کا خیر مقدم کیا۔
بتایا گیا ہے کہ ملاقات میں پی ٹی آئی کے وفد نے امیر جے یو آئی ف سے پارلیمنٹ میں اپوزیشن کو متحد کرنے کیلئے کردار ادا کرنے کی اپیل کی، پی ٹی آئی وفد نے خیبرپختونخواہ اسمبلی سے سینیٹ کی خالی نشست پر جے یو آئی سے تعاون کی درخواست بھی کی، اس کے علاوہ ملاقات کے دوران محمود خان اچکزئی کی بطور اپوزیشن لیڈر نامزدگی پر اتفاق کیا گیا۔

معلوم ہوا ہے کہ ملاقات کرنے والے پاکستان تحریک انصاف کے وفد میں سابق سپیکر اسد قیصر، صوبائی صدر جنید اکبر، شہرام ترکئی شامل تھے، جے یو آئی کی جانب سے مولانا صلاح الدین ایوبی، جلال الدین ایڈوکیٹ، مولانا اسجد محمود ملاقات میں شریک ہوئے، اس موقع پر جمعیت علماء اسلام ف کے سربراہ مولانا فضل الرحمان کی جانب سے پی ٹی آئی وفد کے اعزاز میں کھانے کا بھی اہتمام کیا گیا۔