لاہور (نیوزڈیسک) پنجاب حکومت نے لاہور میں زیرِ زمین پانی کی سطح بلند کرنے کا پلان بنا لیا، جس کے تحت شہر میں ایک ہزار گراؤنڈ واٹر ریچارج ویلز بنائے جائیں گے۔ میڈیا رپورٹس کے مطابق صوبائی دارالحکومت میں زیرِ زمین پانی کی سطح کو برقرار رکھنے اور ریچارج کرنے کے لیے بڑا منصوبہ متعارف کروانے کا فیصلہ کیا گیا ہے، اس حوالے سے سیکرٹری ہاؤسنگ نورالامین مینگل نے لبرٹی چوک گراؤنڈ واٹر ریچارج ویل سائٹ کا دورہ کیا جہاں ایم ڈی واسا غفران احمد نے پراجیکٹ پر بریفنگ دی۔
اس دوران بریفنگ میں بتایا گیا کہ زیر زمین پانی کی سطح کو ریچارج کرنے کے لیے ریچارج ویل بنایا گیا ہے، گراؤنڈ واٹر ریچارج ویل کی کپیسٹی یومیہ 8 ہزار گیلن ہے جب کہ لاہور میں تین گراؤنڈ واٹر ریچارج ویلز فنکشنل ہیں، اس کے علاوہ اس منصوبے کے تحت لاہور میں کل 15 مقامات پر گراؤنڈ واٹر ویل بنائے جائیں گے۔

اس موقع پر گفتگو کرتے ہوئے نورالامین مینگل نے کہا کہ وزیر اعلیٰ پنجاب کی ہدایت کے تحت جدید انجینئرنگ حل متعارف کراویا گیا ہے، پی ایچ اے لاہور تمام پارکس میں گراؤنڈ واٹر ریچارج ویل کے لیے جگہ مختص کرے گی، گراؤنڈ واٹر ریچارج ویلز کی تعمیر کے دوران موجودہ درختوں کا خاص خیال رکھا جائے، ماحولیاتی آلودگی کے تدارک کے لیے اہم فیصلے لیے گئے ہیں، واسا پنجاب کے تحت صوبہ بھر میں گراؤنڈ واٹر ریچارج پوائنٹس بنائے جائیں گے، تمام ادارے اس پراجیکٹ کو سنجیدگی سے مکمل کریں گے۔