واشنگٹن (نیوزڈیسک) امریکی صدر ڈونلڈ ٹرمپ نے ایک اور ملک پر حملے کی دھمکی دیتے ہوئے کہا ہے کہ نائجیریا میں مسیحیوں کو قتل کیا جاتا رہا تو ہم اس کے خلاف فوجی کارروائی کر سکتے ہیں۔ برطانوی خبر رساں ادارے رائٹرز کے مطابق صدر ٹرمپ نے اپنے ایک بیان میں کہا کہ نائجیریا کو ملنے والی تمام امداد روک دی جائے گی، اگر امریکہ نے نائجیریا میں اپنی فوجیں بھیجیں تو اسلامک دہشت گردوں کے مکمل خاتمے کے لیے پوری طاقت کے ساتھ کارروائی کی جائے گی، نائجیریا کی حکومت کی جانب سے مسیحیوں کے قتل کی روک تھام نہ کرنے کی صورت میں محکمہ دفاع کو افریقی ملک میں فوجی کارروائی کی تیاری کا حکم دے دیا ہے۔
بتایا گیا ہے کہ صدر ٹرمپ نے نائجیریا میں مسیحیوں کے ساتھ سلوک کے حوالے سے شواہد پیش نہیں کیے تاہم انہوں نے افریقی ملک کو فوری اقدامات اٹھانے کا کہا، صدر ٹرمپ کے بیان سے ایک روز قبل امریکہ نے نائجیریا کو مذہبی آزادی کی خلاف ورزیوں پر ’خصوصی تشویش کے حامل ممالک‘ کی فہرست میں ڈالا تھا، اس معاملے پر نائجیریا کے وزیراعظم کی طرف سے فی الحال کوئی ردعمل سامنے نہیں آیا۔

معلوم ہوا ہے کہ وائٹ ہاؤس کی جانب سے بھی ممکنہ فوجی کارروائی کے حوالے سے تاحال کوئی بیان جاری نہیں کیا گیا تاہم سیکریٹری دفاع پیٹر ہیگستھ کا کہنا ہے کہ محکمہ جنگ تیاری کر رہا ہے، نائجیریا کی حکومت مسیحیوں کو تحفظ فراہم کرے یا پھر ہم اسلامک دہشت گردوں کو مار ڈالیں گے جو ان خوفناک مظالم کے مرتکب ہیں۔