واشنگٹن (نیوزڈیسک) امریکی صدر ڈونلڈ ٹرمپ نے پاکستان سمیت دیگر ممالک پر جوہری تجربے کرنے کا الزام عائد کردیا۔ بی بی سی کے مطابق امریکہ کے صدر ڈونلڈ ٹرمپ نے دعویٰ کیا ہے کہ اُن کا ملک جوہری تجربے کرے گا کیونکہ دوسرے ممالک بشمول پاکستان، روس، چین اور شمالی کوریا بھی جوہری تجربات کرتے ہیں، دیگر ممالک بھی جوہری تجربات کر رہے ہیں مگر وہ اس بارے میں بتاتے نہیں۔
امریکی نشریاتی ادارے سی بی ایس نیوز کو انٹرویو میں ایک سوال پر انہوں نے جواب دیا کہ ’جی ہاں، ہم جوہری تجربات کریں گے جیسا کہ دیگر ممالک کرتے ہیں‘، اس پر جب ان نے استفسار کیا گیا کہ ’واحد ملک جو اس وقت جوہری تجربات کر رہا ہے وہ شمالی کوریا ہے، چین اور روس نہیں‘، اس پر امریکی صدر نے دعویٰ کیا کہ ’روس بھی جوہری ہتھیاروں کے تجربے کر رہا ہے، چین بھی ایسے تجربے کر رہا ہے بس آپ کو معلوم نہیں ہے‘۔

اس پر میزبان نے کہا کہ ’یہ تو یقیناً بہت بڑی خبر ہے کیوں کہ میری معلومات کے مطابق روس نے حال ہی میں جو تجربہ کیا وہ بنیادی طور پر جوہری ہتھیاروں کی ترسیل کے نظام کا تھا‘، اس پر صدر ٹرمپ نے دعویٰ کیا کہ ’روس تجربے کر رہا ہے اور چین بھی لیکن وہ اس بارے میں بات نہیں کرتے، امریکہ میں جمہوری نظام ہے اور ہم ان سے مختلف ہیں، ہم اس کے بارے میں بات کرتے ہیں کیوں کہ ہمیں اس بارے میں بات کرنی پڑتی ہے کیونکہ دوسری صورت میں آپ لوگ اس بارے میں رپورٹ کریں گے لیکن ان کے پاس ایسے رپورٹرز نہیں جو اس کے بارے میں لکھ سکیں مگر ہمارے یہاں ہیں‘۔
امریکی صدر کا کہنا ہے کہ ’ہم بھی تجربے کریں گے کیونکہ وہ ٹیسٹ کرتے ہیں اور دیگر بھی کرتے ہیں اور یقینی طور پر شمالی کوریا بھی تجربے کر رہا ہے، پاکستان تجربے کر رہا ہے، دنیا بہت بڑی ہے اور آپ کو شاید معلوم نہ ہو کہ وہ کہاں تجربے کر رہے ہیں، وہ زیرِ زمین تجربے کرتے ہیں جہاں لوگوں کو معلوم نہیں ہوتا کہ اصل میں کس چیز کا تجربہ کیا جا رہا ہے، آپ کو تھوڑی سی جنبش محسوس ہوتی ہے، وہ تجربے کر رہے ہیں اور ہم نہیں، ہمیں بھی کرنے ہوں گے‘۔