اسلام آباد (نیوزڈیسک) وفاقی کابینہ کی جانب سے 27ویں آئینی ترمیم کی منظوری دے دی گئی۔ میڈیا رپورٹس کے مطابق ذرائع کا کہنا ہے کہ وفاقی کابینہ اجلاس میں تین ترامیم کی منظوری دی گئی ہے، تجویز کردہ ترامیم میں آئینی کورٹ بنانے، ججز کی ٹرانسفر اور آرٹیکل 243میں تبدیلی شامل ہے، 27ویں ترمیم میں آئین کی مختلف شقوں میں کل 46 ترامیم کی جائیں گی۔
ذرائع کی جانب سے بتایا گیا ہے کہ آرمی ، ایئرفورس اور نیوی کے بعد اب چوتھی فور س” آرمی راکٹ فورس“ (اے آر ایف سی) ہوگی، چیف آف آرمی سٹاف ”کمانڈر آف ڈیفنس فورسز بھی کہلائیں گے، تمام کوآرڈینیشن چیف آف آرمی سٹاف خود بلحاظ کمانڈر آف ڈیفنس فورسز کیا کریں گے، مجوزہ ترامیم کے تحت راکٹ فورس میں اسٹرٹیجک پلان ڈویژن (ایس پی ڈی) بھی شامل ہے۔

ذرائع سے یہ بھی معلوم ہوا کہ ایس پی ڈی پہلے چیئرمین جوائنٹ آف سٹاف کے ماتحت کام کرتی تھی، اب چیئرمین جوائنٹ آف سٹاف کاعہدہ ختم ہوجائے گا اوراس کی جگہ اب کمانڈر آف ڈیفنس فورسز آجائے گی، اسلام آباد میں کابینہ کے اجلاس سے آج منظوری کے بعد ترامیم کو سینٹ اجلاس میں پیش کیاجائے گا، سینٹ میں پیش کرنے کے بعد سینٹ اورقومی اسمبلی کے دونوں ایوانوں کی مشترکہ کمیٹی قائم ہوجائے گی جواس پر غور کرے گی، کمیٹی تمام ترامیم پر اپنی رپورٹ دے گی کمیٹی میں مختلف نمائندوں کو خصوصی طور پر شامل بھی کیا جائے گا۔