استنبول(نیوزڈیسک) پاکستان اور افغانستان کے اختلافات دور نہ ہونے پر استنبول مذاکرات کسی معاہدے کے بغیر ختم ہوگئے۔ میڈیا رپورٹس کے مطابق دونوں ممالک کے مذاکرات میں سرحد پار دہشت گردی کی نگرانی اور اس کی روک تھام کے طریقہ کار پر گہرے اختلافات کو دور کرنے میں کامیابی حاصل نہ ہوسکی، مذاکرات کے ناکام ہونے کے بعد پاکستانی وفد ہوٹل چھوڑ کر ایئرپورٹ روانہ ہوگیا، تاہم دونوں ممالک کے درمیان ایک کمزور جنگ بندی اب بھی برقرار ہے۔
بتایا گیا ہے کہ پاکستان اور افغانستان کے درمیان مذاکرات کا تیسرا دور جمعرات کو استنبول میں شروع ہوا جو دو دن تک جاری رہا، پاکستانی وفد کی قیادت انٹر سروسز انٹیلی جنس (آئی ایس آئی) کے ڈائریکٹر جنرل لیفٹیننٹ جنرل عاصم ملک نے کی، پاکستانی وفد میں اعلیٰ فوجی، خفیہ اور وزارتِ خارجہ کے حکام بھی شامل تھے جب کہ افغان طالبان کی طرف سے جنرل ڈائریکٹوریٹ آف انٹیلی جنس (جی ڈی آئی) کے سربراہ عبدالحق واثق نے وفد کی قیادت کی، سہیل شاہین، انس حقانی اور نائب وزیر داخلہ رحمت اللہ نجیب بھی وفد کا حصہ تھے۔

معلوم ہوا ہے کہ دونوں وفود کے درمیان کوئی براہِ راست ملاقات نہیں ہوئی، تاہم ایک روز قبل قطری اور ترک ثالثوں کی موجودگی میں دونوں فریقین نے آمنے سامنے ملاقات کی تھی، آئی ایس آئی کے سربراہ اور پاکستانی وفد کے کچھ ارکان استنبول سے روانہ ہوگئے لیکن پاکستانی فریق اب بھی عمل کے دوبارہ شروع ہونے کا امکان مسترد نہیں کر رہا، اس تعطل کو توڑنے کی کوشش کی جائے گی اور ممکنہ طور پر کچھ سینئر حکام ثالثوں کے ساتھ کام کرنے کے لیے وہیں موجود ہیں۔
دفتر خارجہ کے ترجمان طاہر حسین اندرابی نے صحافیوں کو بتایا کہ ’پاکستانی وفد نے اپنا مؤقف جامع اور شواہد پر مبنی انداز میں پیش کیا، پاکستانی وفد نے ثالثوں کو اپنے شواہد پر مبنی، جائز اور منطقی مطالبات پیش کیے ہیں، جس کا واحد مقصد سرحد پار دہشت گردی کا خاتمہ ہے‘، ادھر افغان حکام نے دعویٰ کیا ہے کہ ان کی تجاویز منطقی اور پاکستان کے لیے آسانی سے قابلِ عمل ہیں لیکن انہوں نے اسلام آباد کے مطالبات کو غیر حقیقی اور جارحانہ قرار دیا۔