لاہور(نیوزڈیسک) وزیر اعلیٰ پنجاب کی ہدایت پر محکمہ داخلہ میں علماء کرام سے ملاقاتوں کا سلسلہ جاری ہے۔ سوموار کو صوبائی وزیر و چیئرمین کابینہ کمیٹی برائے امن و امان خواجہ سلمان رفیق نے محکمہ داخلہ میں وفاق المدارس الشیعہ پاکستان کے وفد سے ملاقات کی۔ علماء کرام کے وفد کی قیادت سربراہ ادارہ منہاج الحسین ڈاکٹر محمد حسین اکبر نے کی جبکہ وفد میں مرکزی سیکرٹری جنرل وفاق المدارس علامہ محمد افضل حیدری، نائب صدر علامہ سید مرید حسین نقوی، محمد غلام باقر گھلو، لال حسین توحیدی، مہتمم اعلیٰ ادارہ منہاج الحسین علامہ محمد سبطین اکبر، علامہ سید محسن علی شاہ، قاری سید اذکار حسین نقوی اور مولانا سید مستنصر عباس کاظمی شریک تھے۔
ملاقات میں سیکرٹری داخلہ پنجاب ڈاکٹر احمد جاوید قاضی، سیکرٹری اوقاف سید طاہر رضا بخاری، ڈی آئی جی سپیشل برانچ، ایڈیشنل سیکرٹری انٹرنل سکیورٹی احسان جمالی، چیف ایگزیکٹو آفیسر پنجاب چیریٹیز کمیشن کرنل شہزاد عامر اور متعلقہ افسران نے شرکت کی۔


ملاقات کے دوران امن و امان کی صورتحال اور اتحاد بین المسلمین پر تبادلہ خیال ہوا۔ ملاقات میں صوبائی وزیر خواجہ سلمان رفیق کا کہنا تھا کہ محکمہ داخلہ میں وفاق المدارس الشیعہ پاکستان کے وفد کو خوش آمدید کہتے ہیں۔

حکومت پنجاب صوبہ بھر میں اتحاد بین المذاہب اور اتحاد بین المسلمین کو فروغ دے رہی ہے۔ انہوں نے کہا کہ پاکستان کو بدقسمتی سے دہشتگردی کا سامنا رہا ہے اور آج اس امر کی ضرورت ہے کہ اتحاد بین المسلمین کو فروغ دیا جائے۔ پاکستان کی ترقی کا راز ایک خوشحال اور پر امن ریاست میں مخفی ہے۔ خواجہ سلمان رفیق نے کہا کہ اسلام امن اور سلامتی کا دین ہے۔
دین اسلام ہمیں برداشت، بھائی چارے اور اتحاد بین المسلمین کا درس دیتا ہے۔ پاکستان کی ترقی کیلئے اداروں سمیت تمام سٹیک ہولڈرز نے اپنا بنیادی کردار ادا کرنا ہے۔ انہوں نے کہا کہ ریاست پاکستان امن، بھائی چارے اور تشدد کے کلچر کی مخالفت کی امین ہے۔ اللہ تعالیٰ کے احکامات اور نبی کریم ؐ کی سنت پر عمل کرنے والے جید علماء کرام امت مسلمہ کا فخر ہیں۔
اللہ تعالیٰ کے احکامات اور نبی کریمؐ کی سنت کی روشنی میں رہنمائی کیلئے علماء کرام سے رجوع کرتے رہیں گے۔ سیکرٹری داخلہ پنجاب ڈاکٹر احمد جاوید قاضی نے کہا کہ معزز علماء کرام ہمیشہ امن کے فروغ اور تشدد کے خاتمے کا درس دیتے ہیں اور ان کے تمام مسائل کا فوری حل حکومت پنجاب کی اولین ترجیح ہے۔ سیکرٹری داخلہ پنجاب نے کہا کہ عوام کے جان و مال اور عزت و آبرو کا تحفظ ریاست کی بنیادی ذمہ داری ہے۔
لوگوں کو دین کی صحیح روح سے آگاہ کرنا علماء کرام کی عظیم خدمت ہے۔ علماء کرام نے گفتگو کرتے ہوئے کہا کہ موجودہ حالات امن و سکون اور سلامتی کا تقاضہ کرتے ہیں اور قیام امن اور اتحاد بین المسلمین کیلئے حکومت پنجاب کے شانہ بشانہ کھڑے ہیں۔ علماء کرام نے اداروں اور نظام مدارس کے درمیان بہترین ہم آہنگی کیلئے سفارشات پیش کیں۔