لاہور (نیوزڈیسک) امیر جماعت اسلامی حافظ نعیم الرحمان کا کہنا ہے کہ پاکستان کے نوجوانوں میں غم اور غصہ ہے، وہ چاہتے ہیں حالات تبدیل ہوں، انقلاب بہت جلد آپ کے دروازے پر دستک دے گا، خاندانوں اور وراثتی سیاست پر چلنے والے بڑا انقلاب نہیں لا سکتے، تمام سیاسی کارکن جماعت اسلامی کے ساتھ چلیں۔ لاہور میں جماعت اسلامی کے تین روزہ اجتماع کے شرکاء سے خطاب کرتے ہوئے انہوں نے کہا کہ یہ ظالم نئی نسل کو تباہ کر رہے ہیں، ہمارا عدالتی نظام گلا سڑا نظام ہے، جو لوگوں کو حق اور انصاف نہیں دیتا، آئین غلط نہیں نظام غلط ہے جس کو جڑ سے اکھاڑ کر پھینکنا پڑے گا اور آئین کے مطابق کرنا پڑے گا، تھانوں کا نظام بدلنا پڑے گا، پولیس ایکٹ میں تبدیلی کرنی پڑے گی، پولیس کا موجودہ نظام اصلاحات کے بغیر نہیں چل سکتا۔

حافظ نعیم الرحمان کہتے ہیں کہ قانون کی نظر میں سب برابر ہیں اور حقیقی تبدیلی اسی وقت آئے گی جب نظام کو اللہ کی مرضی کے مطابق ڈھالا جائے، بدل دو نظام کا مطلب یہ ہے کہ جاگیردارانہ ڈھانچے کو ختم کرکے ایک منصفانہ نظام قائم کیا جائے، جدوجہد کبھی غیر منظم نہیں ہوتی، جماعت اسلامی گلی گلی اور محلے محلے جا کر عوام میں شعور پیدا کرے گی، جماعت اسلامی ایک مڈل کلاس جماعت ہے جہاں قیادت اور کارکن کے درمیان کوئی فاصلہ نہیں۔
انہوں نے مزید کہا کہ جماعت اسلامی میں غریب، امیر، مزدور اور کسان سب شامل ہیں اور جماعت کے اندر حقیقی جمہوریت موجود ہے، نوجوان چاہتے ہیں کہ حالات تبدیل ہوں اور سیاسی کارکنوں کی عزت کی جائے، اختلافِ رائے کا احترام کرتے ہوئے ملک کے مستقبل کے لیے مل کر چلنا ہوگا، سیاسی کارکن اگر حقیقی انقلاب چاہتے ہیں تو جماعت اسلامی کے ساتھ مل کر جدوجہد کریں، بزرگ رہنماؤں نے آئینی فریم ورک تشکیل دینے کے لیے بڑی قربانیاں دی ہیں اور اسی تسلسل کو آگے بڑھانا ہوگا۔