لاہور (نیوزڈیسک) وزیراعلیٰ پنجاب مریم نواز کا کہنا ہے کہ میرٹ، شفافیت اور بروقت فیصلہ سازی حکومت کے رہنما اصول ہیں، کوئی کہہ دے میں نے کسی کی سفارش کی ہے تو استعفیٰ دے دوں گی۔ تفصیلات کے مطابق وزیراعلیٰ پنجاب مریم نواز شریف سے نیشنل سکیورٹی ورکشاپ کے شرکاء نے ملاقات کی، وزیراعلیٰ پنجاب نے نیشنل ڈیفنس یونیورسٹی کی 27ویں نیشنل سکیورٹی ورکشاپ کے وفد کا پرتپاک استقبال کیا اور شرکاء کو حکومت پنجاب کے عوامی فلاح و بہبود کے پراجیکٹس اور اقدامات سے آگاہ کیا، اس موقع پر انہوں نے شرکاء کے سوالات کے جوابات دیئے اور حکومت کے مختلف شعبوں میں کی جانے والی کامیابیوں پر بھی روشنی ڈالی۔
مریم نواز نے کہا کہ آپریشن بنیان مرصوص کی کامیابی کے بعد پاکستان دنیا بھر میں سربلند ہے اور پنجاب میں بہت کچھ کر چکے ہیں اور بہت کچھ ہونے جارہا ہے، حکومت وسائل کی غیر منصفانہ تقسیم، احتساب کی کمی اور غربت جیسے مسائل کے خاتمے پر توجہ دے رہی ہے، حکومت نے تعلیم، صحت، ماحولیات اور انفراسٹرکچر کے شعبوں میں بھی کئی اہم اقدامات کیے ہیں، خاص طور پر بچوں، خواتین اور معذور افراد کے تحفظ اور سہولیات پر زور دیا جارہا ہے، کہتے تھے بیٹی آتی ہے تو گھر چمکاتی ہے، ہم پر تنقید کرنے والے صحافی کی اہلیہ بھی یہ کہنے پر مجبور ہیں کہ مریم نواز کے پنجاب میں خود کو محفوظ سمجھتی ہوں۔

انہوں نے بتایا کہ پنجاب میں 30 ہزار کلو میٹر طویل 1650 روڈز تعمیر ہو رہی ہیں، جدید ہسپتال قائم کیے جا رہے ہیں، ایئر ایمبولینس سروس کے ذریعے مریض بروقت منتقل کیے جاتے ہیں، سکولوں و کالجوں کو ڈرگ فری بنایا جا رہا ہے، میرٹ، شفافیت اور بروقت فیصلہ سازی حکومت کے رہنما اصول ہیں، کوئی کہہ دے میں نے کسی کی سفارش کی ہے تو استعفیٰ دے دوں گی، اس کے علاوہ پنجاب کو 5 سال میں کرپشن فری بنانے کے لیے اقدامات کیے جا رہے ہیں، عوامی فلاح و بہبود، تعلیم، صحت اور ماحولیات کے منصوبے مستقبل میں بھی جاری رہیں گے، سرمایہ کاروں کے لیے دروازے کھلے ہیں۔