اسلام آباد (نیوزڈیسک) وفاقی آئینی عدالت نے دھاندلی کے الزامات کے معاملے پر پاکستان تحریک انصاف کی درخواست سماعت کے لیے مقرر کردی۔ تفصیلات کے مطابق کیس کی سماعت کیلئے آئینی عدالت کے چیف جسٹس امین الدین نے پانچ رکنی لارجر بینچ تشکیل دیا ہے، بینچ 25 نومبر کو اس حوالے سے سماعت کرے گا، جسٹس عامر فاروق 5 رکنی لارجر بینچ کی سربراہی کریں گے، سلمان اکرم راجہ نے انتخابی دھاندلی انکوائری ٹریبونل تشکیل کیلئے رجوع کیا تھا۔
بتایا گیا ہے کہ اس حوالے سے پاکستان تحریک انصاف نے ٹریبونل تشکیل دینے کیلئے سپریم کورٹ میں درخواست دائر کی تھی، تاہم 27ویں ترمیم کے بعد تحریک انصاف کی اس درخواست کو آئینی عدالت ٹرانسفر کردیا گیا ہے جہاں سماعت کیلئے تشکیل دیئے جانے والے بینچ میں جسٹس علی باقر نجفی، جسٹس کے کے آغا خان شامل ہیں، ان کے علاوہ جسٹس روزی خان اور جسٹس ارشد حسین شاہ بھی بینچ کا حصہ ہیں۔

علاوہ ازیں وفاقی آئینی عدالت نے اپنی آفیشل ویب سائٹ www.fccp.pakistan.gov.pk کا آغاز کر دیا ہے جس سے اہم معلومات اور وسائل کو عوامی طور پر قابل رسائی بنایا جا سکتا ہے، آئینی عدالت کے چیف جسٹس امین الدین خان کا خصوصی پیغام ویب سائٹ پر اپ لوڈ کیا گیا ہے جس میں ادارے کے وژن اور شفافیت کے عزم کا خاکہ پیش کیا گیا ، وفاقی آئینی عدالت کے تمام ججوں کے پروفائلز بھی آن لائن دستیاب ہیں، مزید برآں سرکاری ویب سائٹ پر آئندہ عدالتی ہفتے کے لیے کاز لسٹ پیش کی گئی ہے جس سے وکلاء، سائلین اور عام لوگوں کو کیس کے شیڈول تک آسانی سے رسائی حاصل ہو سکتی ہے۔