لاہور (نیوزڈیسک) امیر جماعت اسلامی حافظ نعیم الرحمان کا کہنا ہے کہ ملک میں نئے عام انتخابات کے اعلان تک کسی الیکشن میں حصہ نہیں لیں گے، ہم قوم پرست نہیں بنیں گے، صوبوں کو آپس میں نہیں لڑائیں گے۔ مینار پاکستان لاہور پر اجتماع سے خطاب کرتے ہوئے انہوں نے کہا کہ آخری حد تک جدوجہد جاری رکھیں گے، پاکستان کی جماعتوں میں نظم و ضبط کا بحران ہے، فلسطین میں انسانیت کا قتل عام ہورہا ہے، وقت آگیا ہے کہ ظالموں کے خلاف متحد ہوجائیں، نظریہ پاکستان سے نفرت کرنے والا جماعت اسلامی کا نہیں، ہم قوم پرست نہیں بنیں گے، ہم صوبوں کو آپس میں نہیں لڑائیں گے، تقسیم قبول نہیں، سب کو سینے سے لگائیں گے، عام انتخابات کے اعلان تک کسی الیکشن میں حصہ نہیں لیں گے، نظم وضبط کے بغیر تحریکیں ہواؤں میں بکھر جاتی ہیں، وقتی مقبولیت انسان کو تباہی کے دھانے پر کھڑا کردیتی ہے، طاقت اجتماعیت میں ہے اس لیے ہمیں اجتماعیت کے ساتھ جڑ کر کام کرنا ہوگا۔
بتایا گیا ہے کہ لاہور کے مینارِ پاکستان میں جاری اجتماعِ عام کے دوران نیشنل یوتھ ایکسیلینس ایوارڈز کی خصوصی تقریب منعقد کی گئی جس میں مختلف شعبوں میں نمایاں کارکردگی دکھانے والے نوجوانوں کو اعزازات سے نوازا گیا، ایوارڈ شو کا مقصد پاکستان کی نوجوان نسل کی حوصلہ افزائی کرنا اور اُن باصلاحیت چہروں کو سامنے لانا تھا جنہوں نے اپنی محنت اور صلاحیتوں کے ذریعے ملک کا نام روشن کیا، تقریب میں ملک بھر سے آئے ہوئے نوجوانوں نے شرکت کی اور مختلف کیٹیگریز میں ایوارڈز تقسیم کیے گئے۔
معلوم ہوا ہے کہ معروف سوشل میڈیا کانٹینٹ کریٹرز طلحہ احمد اور محمد شیراز بھی اُن نمایاں شخصیات میں شامل تھے جنہیں خصوصی طور پر سراہا گیا، حافظ نعیم الرحمان نے دونوں کو ان کی تخلیقی صلاحیت، مثبت اندازِ بیان اور معاشرے میں تعمیری پیغام عام کرنے پر یوتھ ایکسیلینس ایوارڈز سے نوازا، اسلام 360 ایپ کے بانی زاہد حسین چھیپا کو بھی مینار پاکستان اجتماع عام میں یوتھ ایکسیلینس ایوارڈ دیا گیا، اسی طرح عالمی شہرت یافتہ ویٹ لفٹر نوح دستگیر بٹ، کوہ پیما شہروز کاشف کو بھی ایوارڈ سے نوازا گیا۔