راولپنڈی (نیوزڈیسک) پاکستان اور سعودی عرب نے دفاعی اشتراک، سکیورٹی تعاون اور انسداد دہشت گردی کی کوششوں کو مزید بڑھانے کی اہمیت پر زور دیا ہے۔ مسلح افواج کے شعبہ تعلقات عامہ ( آئی ایس پی آر ) کے مطابق سعودی مسلح افواج کے چیف آف جنرل اسٹاف (سی جی ایس) جنرل فیاض بن حمید الرویلی نے آج جنرل ہیڈ کوارٹرز (جی ایچ کیو) میں پاکستان کے چیف آف آرمی سٹاف فیلڈ مارشل سید عاصم منیر سے ملاقات کی ہے۔
فوج کے ترجمان ادارے نے بتایا کہ ملاقات کے دوران پاکستان اور سعودی عرب کے درمیان دیرینہ اور سٹریٹجک عسکری تعاون کو مضبوط بنانے پر خصوصی توجہ مرکوز کرتے ہوئے باہمی دلچسپی کے امور پر تبادلہ خیال کیا گیا، دونوں ممالک کے درمیان دفاعی اشتراک، سکیورٹی تعاون اور انسداد دہشت گردی کی کوششوں کو مزید بڑھانے کی اہمیت پر زور دیا گیا جو گہرے دو طرفہ تعلقات کے ستون ہیں۔

آئی ایس پی آر سے معلوم ہوا ہے کہ معزز مہمان نے سعودی مسلح افواج کے ساتھ متعدد شعبوں میں پاکستان کے تعاون کو سراہا اور تعاون کے مضبوط رشتوں کو مزید آگے بڑھانے کے عزم کا اعادہ کیا، قبل ازیں جی ایچ کیو پہنچنے پر جنرل فیاض بن حمید الرویلی نے یادگار شہداء پر پھولوں کی چادر چڑھائی، اس موقع پر پاک فوج کے چاق و چوبند دستے نے انہیں گارڈ آف آنر پیش کیا۔