پشاور (نیوزڈیسک) ایف سی ہیڈ کوارٹر پشاور میں خودکش حملہ کرنے والے دہشتگردوں کی شناخت ہوگئی۔ تفصیلات کے مطابق ایف سی ہیڈکوارٹر پشاور خود کش حملے کی سی سی ٹی وی فوٹیج سامنے آگئی جس میں دیکھا جاسکتا ہے کہ دھماکے سے کچھ دیر قبل ایک شخص سفید کپڑوں میں ملبوس چادر اوڑھے وہاں کھڑا ہے اس دوران اچانک زور دار دھماکہ ہوگیا۔
سکیورٹی ذرائع کا کہنا ہے کہ ایف سی ہیڈ کوارٹر پر حملہ کرنے والے دہشتگردوں کی شناخت ہوچکی ہے، ہلاک ہونے والے تینوں دہشتگرد افغانی تھے، مارے جانے والے دہشتگردوں سے ہتھیار و گولہ بارود برآمد ہوا، دہشتگردوں کا مقصد لوگوں کو یرغمال بنانا تھا۔

بتایا جارہا ہے کہ پشاور کینٹ میں واقع فیڈرل کانسٹیبلری ہیڈکوارٹرکے گیٹ پر خود کش حملہ کے نتیجے میں 3 اہلکار شہید اوردو زخمی ہو گئے، پولیس، فیڈرل کانسٹیبلری اور پاک فوج کے کمانڈوز نے انتہائی بہادری کا مظاہرہ اور بروقت رسپانس کرتے ہوئے 2 حملہ آوروں کو ہلاک کر دیا، سی سی پی او پشاور ڈاکٹر میاں سعید احمد نے بتایا کہ دھماکہ صبح 8 بجکر 10 منٹ پر ہوا، خوکش حملہ آور نے خود کو دھماکے سے اڑا دیا، دھماکہ اس قدر زور دار تھا کہ اس کی آواز دور دور تک سنی گئی، خود کش دھماکہ کے بعد فائرنگ کی آوازیں بھی سنی گئیں، جس کے بعد سنہری مسجد روڈ پر فیڈرل کانسٹیبلری کے ہیڈ کوارٹر پر حملے کی وجہ سے صدر روڈ کو ٹریفک کے لیے بند کردیا گیا اور علاقے میں سکیورٹی ہائی الرٹ کر دی گئی۔

ڈپٹی کمانڈنٹ فیڈرل کانسٹیبلری جاوید اقبال نے بتایا کہ تینوں خودکش حملہ آور مارے گئے ہیں، فیڈرل کانسٹیبلری کے جوانوں نے بہادری سے دہشتگردوں کا مقابلہ کیا، خودکش حملے میں فیڈرل کانسٹیبلری کے 3 اہلکار شہید ہوئے، حملے میں 5 افراد زخمی ہوئے جنہیں ہسپتال منتقل کردیا گیا، حملے میں 2 اہلکار اور 3 شہری ہیں، تمام زخمیوں کو طبی امداد فراہم کی جا رہی ہے اور ان کی حالت تسلی بخش ہے، قانون نافذ کرنے والے اداروں کے اہلکاروں نے علاقے کو گھیرے میں لے لیا ہے اور کلیئرنس آپریشن جاری ہے۔