لاہور (نیوزڈیسک) قومی اسمبلی کی 6 اور صوبائی اسمبلی کی 7 نشستوں پر ضمنی انتخابات کے مکمل نتائج سامنے آگئے، مجموعی 13 میں سے 12 نشستیں مسلم لیگ ن نے جیت لیں جب کہ ایک سیٹ پر پیپلزپارٹی کامیاب ہوگئی۔ غیر سرکاری و غیر حتمی نتائج کے مطابق این اے 129 پر مسلم ليگ ن کے حافظ میاں محمد نعمان، این اے 185 ڈیرہ غازی خان پر محمود قادر خان، این اے 143 ساہیوال پر محمد طفیل جٹ کامیاب ہوئے، این اے 104 فیصل آباد میں ن لیگ کے دانیال احمد اور این اے 96 میں بلال بدر چوہدری کو کامیابی مل گئی۔
اسی طرح پی پی 87 میانوالی پر علی حیدر نیازی، پی پی 98 فیصل آباد پر آزاد علی تبسم، پی پی 115 فیصل آباد میں طاہر پرویز جیت گئے، پی پی 116 فیصل آباد میں احمد شہریار، پی پی 203 ساہیوال میں محمد حنیف، پی پی 73 سرگودھا پر سلطان علی رانجھا کامیاب ہوئے، پی پی 269 مظفر گڑھ پر ن لیگ کو ناکامی کا سامنا کرنا پڑا، اس حلقے میں پیپلز پارٹی کے میاں علمدار عباس قریشی فاتح قرار پائے۔

بتایا جارہا ہے کہ قومی اور صوبائی اسمبلی کے 13 حلقوں میں ضمنی الیکشن کیلئے پولنگ ہوئی، جن میں قومی اسمبلی کے 6 اور پنجاب اسمبلی کے 7 حلقے شامل ہیں، پولنگ کا آغاز صبح 8 بجے ہوا جو بغیر کسی وقفے کے شام 5 بجے تک جاری رہا، لاہور، فیصل آباد، ساہیوال، سرگودھا، میانوالی، مظفرگڑھ اور ہری پور میں ووٹنگ ہوئی، الیکشن کمیشن حکام کا کہنا تھا کہ ضمنی انتخاب کے دوران سکیورٹی کے سخت انتظامات کیے گئے، 2ہزار 792 پولنگ سٹیشنز میں سے 408 انتہائی حساس اور 1ہزار 32 حساس قرار دیئے گئے جہاں دو ہزار سے زائد اہلکار سکیورٹی کیلئے تعینات تھے۔