راولپنڈی (نیوزڈیسک) ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان نے افغانستان پر حملہ نہیں کیا، پاکستان جب بھی حملہ کرتا ہے تو اعلانیہ کرتا ہے۔ سینئر صحافیوں کو میڈیا بریفنگ کے دوران انہوں نے کہا کہ طالبان حکومت ریاست کی طرح فیصلہ کرے، نان اسٹیٹ ایکٹر کی طرح فیصلہ نہ کرے، طالبان حکومت کب تک عبوری رہے گی، نان کسٹم پیڈ گاڑیوں پر فوری پابندی عائد کی جائے کیوں کہ دہشتگردی کے بہت سے واقعات میں نان کسٹم پیڈ گاڑیاں استعمال ہوئیں، ہم ریاست ہیں، ریاست کے طورہی ردعمل دیتے ہیں، یہ نہیں ہوسکتا کہ ہم پر حملے بھی ہوں اور ہم تجارت بھی کریں، ہم افغان عوام کے نہیں بلکہ دہشتگردی کے خلاف ہیں۔

ڈی جی آئی ایس پی آر کا کہنا ہے کہ ہماری نظر میں طالبان میں کوئی تفریق نہیں، ریاست میں گڈ اور بیڈ طالبان کی کوئی گنجائش نہیں، بیرون ملک سے سوشل میڈیا اکاؤنٹ ریاست کیخلاف بیانیہ بنا رہے ہیں، گڈ اور بیڈ طالبان بیانیے کا حصہ ہیں، پاکستان نے افغانستان پر حملہ نہیں کیا کیوں کہ پاکستان کبھی سویلین پر حملہ نہیں کرتا، پاکستان جب بھی حملہ کرتا ہے تو اعلانیہ کرتا ہے، افغان رجیم دہشت گردوں کے خلاف قابل تصدیق کارروائی کرے، دہشت گردوں کے خلاف قابل تصدیق کارروائی کے بغیر کوئی مذاکرات نہیں ہوں گے۔