گوجرہ (نیوزڈیسک) صوبہ پنجاب کے ضلع ٹوبہ ٹیک سنگھ کے علاقہ گوجرہ میں اذان سے پہلے لاؤڈ سپیکر میں درود پڑھنے پر امام مسجد پر لاؤڈ سپیکر ایکٹ کی خلاف ورزی کا مقدمہ درج کرلیا گیا۔ اطلاعات کے مطابق تھانہ سٹی گوجرہ میں درج مقدمہ کے متن میں کہا گیا ہے کہ پولیس اہلکار سرکاری گاڑی میں بسلسله گشت حفیظ پارک گوجرہ کے علاقہ سے گزر رہے تھے کہ اس دوران جامعہ مسجد غوثیہ رضویہ حفیظ پارک گوجرہ کا امام مسجد آصف محمود مصطفائی ولد عبد الرحمان قوم جٹ سکنہ چک نمبر 96 ج ب حال مین بازار حفیظ پارک گوجرہ جو کہ اذان سے قبل سپیکر چلا کر صلاۃ پڑھ رہا تھا، پولیس کے موقع پر پہنچنے پر امام مسجد آصف محمود مسجد کے مین گیٹ کو تالا لگا کر فرار ہوگیا۔

ادھر راولپنڈی میں لاؤڈ سپیکر ایکٹ کا اطلاق سبزی فروش پر بھی کردیا گیا اور لاؤڈ سپیکر لگا کر سبزی فروخت کرنے والے شخص کے خلاف ساؤنڈ سسٹم ایکٹ کے تحت مقدمہ درج کرلیاگیا، مقدمہ تھانہ چونترہ پولیس کے سب انسپکٹر وقار کی مدعیت میں درج کیاگیا ، جس میں کہا گیا کہ اہل کار گشت ڈیوٹی پر تھے کہ چونترہ گاؤں کی جانب سے ایک سوزوکی گاڑی پر ایک شخص سبزی فروخت کرتا آیا، جس کی گاڑی پر لاؤڈ سپیکر نصب تھا،جس کی آواز دور تک سنی جا رہی تھی، سبزی فروش نے اپنا نام صدام بتایا جو ساؤنڈ سسٹم و سپیکر ایکٹ کی خلاف ورزی کا مرتکب پایا گیا۔

بتایا جارہا ہے کہ پنجاب میں کسی بھی جماعت، فرد یا کاروبار میں لاؤڈ سپیکر کے استعمال پر سخت کارروائی کا فیصلہ کیا گیا ہے، لاؤڈ سپیکر ایکٹ کی خلاف ورزی کرنے والوں سے نمٹنے کے لیے سی سی ٹی وی کیمروں اور ایڈونس ٹیکنالوجی کا استعمال کیا جائے گا، وزیراعلیٰ پنجاب مریم نواز کی زیرِ صدارت اجلاس میں پنجاب حکومت نے لاؤڈ سپیکر ایکٹ کے سخت ترین نفاذ کا فیصلہ کیا جس کے تحت صوبے بھر میں جمعہ کے خطبے اور پانچ وقت کی اذان کے علاوہ لاؤڈ سپیکر استعمال نہیں ہوسکے گا۔