کسٹم اینڈ ٹیکسیشن کورٹ نے گدھے کی کھالیں غیر قانونی طور پر بیرون ملک بھیجنے کے الزام میں گرفتار چینی باشندے سمیت 7 ملزمان کو 7روزہ جسمانی ریمانڈ پر کسٹم کے حوالے کر دیا۔گلستان جوہر کے علاقے سے گرفتار 7 ملزمان کو کسٹم ا ینڈ ٹیکسیشن کورٹ میں پیش کیا گیا۔عدالت کو بتایا گیا کہ ملزمان کو گزشتہ روز گرفتار کیا گیاتھا جن کے قبضے سے ملنے والی 592 بوریاں سے گدھے کی 4 ہزار 736 کھالیں برآمد ہوئی ہیں۔ملزمان یہ کھالیں لاہور سے لے کر آئے تھے جو غیر قانونی طور پر بیرون ملک اسمگل کی جانی تھیں۔ملزمان میں چینی باشدہ ٹو زونگ زیو،جبکہ 6 پاکستانیوں میں افشاں، احتشام، دانیال، محمد جمن، محمد فیصل اور ذیشان شامل ہیں۔کسٹم نے ملزمان کے 14 روزہ جسمانی ریمانڈ کی استدعا کی تھی جس پر عدالت نے تمام ملزمان کو 7 روزہ جسمانی ریمانڈ پر کسٹم کے حوالے کردیا۔کسٹم حکام کے مطابق کھالوں کی قیمت کروڑوں روپے مالیت کی بنتی ہے۔