ترکی میں گزشتہ روز مزید تيئس ججوں اور پراسيکيوٹرز کی گرفتاری کے وارنٹ جاری کر دیئے گئے۔سرکاری نيوز ايجنسی انادولو کے مطابق سترہ ججوں اور چھ پراسيکيوٹرز کے وارنٹ ان کی ’ایک دہشت گرد تنظیم کی رکنيت‘ کی بنياد پر جاری کيے گئے۔شبہ ہے کہ يہ سب فتح اللہ گولن کے حامی ہیں۔ ترک صدر رجب طيب ايردوآن کے مطابق گزشتہ برس ان کی حکومت کا تختہ الٹنے کی ناکام کوشش کے پيچھے گولن ہی کا ہاتھ تھا۔ترکی ميں ايک روز قبل بھی 107 ججوں کو ان کے عہدوں سے فارغ کر ديا گيا تھا۔ گزشتہ برس ايمرجنسی کے نفاذ کے بعد سے اب تک تقریباً سواچار ہزار ججوں اور پراسيکيوٹرز کو برطرف کيا جا چکا ہے۔مجموعی طور پر تقریباً ايک لاکھ سرکاری ملازمين کو نوکریوں سے نکالا جا چکا ہے جبکہ سينتاليس ہزار ملازمین کو گرفتار بھی کيا جا چکا ہے۔