إِنَّا لِلَّٰهِ وَإِنَّا إِلَيْهِ رَاجِعُونَ

(ٹی ایم نیوز) پاکستان کے ممتاز شاعر، ڈرامہ نگار، فلم ساز اور ٹیلی ویژن کے کردار ’جیدی‘ سے شہرت حاصل کرنے والے معروف اداکار اطہر شاہ خان انتقال کر گئے ہیں۔

ان کا انتقال اتوار کی صبح کراچی میں ہوا اور وہ ایک طویل عرصے سے علیل تھے۔

اطہر شاہ خان انڈیا کے شہر رام پور میں پیدا ہوئے اور سنہ 1947 میں اپنے خاندان کے ساتھ لاہور ہجرت کی اور پھر سنہ 1957 میں وہ کراچی منتقل ہو گئے۔

اطہر شاہ خان نے لاہور اور پشاور سے ابتدائی تعلیم حاصل کی اور پھر کراچی میں اردو سائنس کالج سے گریجویشن کیا، بعد ازاں انھوں نے پنجاب یونیورسٹی سے صحافت کے شعبے میں ماسٹرز بھی کیا۔

انتظار فرمائیے، وہ ڈرامہ تھا جس نے اطہر شاہ خان کو ’جیدی‘ بنا کر شہرت کی بلندیوں پر پہنچا دیا تھا۔

’جیدی‘ کا شمار ٹیلی ویژن کے ابتدائی ڈرامہ نگاروں اور فن کاروں میں کیا جاتا ہے۔

اطہر شاہ خان کے دیگر سپرہٹ ڈراموں میں ہیلو ہیلو، جانے دو، برگر فیملی، آشیانہ، آپ جناب، جیدی اِن ٹربل، پرابلم ہاؤس، ہائے جیدی، کیسے کیسے خواب، با اَدب با ملاحظہ ہوشیار شامل ہیں۔

2001 میں انھیں حکومت پاکستان کی جانب سے پرآئیڈ آف پرفارمنس ایوارڈ سے نوازا گیا اور پاکستان ٹیلی ویژن نے اپنی سلور جوبلی کے موقعے پر جیدی کو گولڈ میڈل سے بھی نوازا گیا۔