پاکستانی دفتر خارجہ نے ایرانی سفیر مہدی ہنردوست کو طلب کرلیا۔دفتر خارجہ کے مطابق ایرانی سفیر سے ایرانی افواج کےچیف آف اسٹاف کے بیان پر تحفظات کا اظہار کرتے ہوئےکہا ہے کہ ایرانی کمانڈر کے بیانات سے منفی تاثر پیدا ہوا۔دفتر خارجہ کا مزید کہنا ہے کہ ایرانی حکام کو اس قسم کے بیانات سے گریز کرنا چاہیے،اس طرح کے بیانات سے دونوں ملکوں کے تعلقات خراب ہونے کا اندیشہ ہے۔واضح رہے کہ ایرانی فوج کے چیف آف اسٹاف جنرل محمد حسین باقری نے گزشتہ روز اپنے بیان میں کہا تھا کہ پاکستان کو اپنی سرزمین پر دہشت گردوں کے ٹھکانوں کو ختم کرنا چاہیے تاہم اگر حملے جاری رہے تو دہشت گردوں اوران کی پناہ گاہوں کو نشانہ بنایا جائے گا اور انہیں تباہ کردیا جائے گا چاہے وہ کہیں بھی ہوں۔