بیجنگ (نیوز ڈیسک) چین اور پا کستان نے سی پیک کی اعلی معیار کی تر قی کو جا ری رکھنے پر اتفاق کیا ہے جبکہ چین کے ریاستی کونسلر اور وزیر خارجہ وانگ ای نے کہا ہے کہ بین الاقوامی صورتحال میں کسی بھی تبدیلی سے قطع نظر، چین پاکستان کے ساتھ اپنے تعلقات کا سٹریٹجک اور طویل مدتی تناظر میں فروغ جاری رکھے گا اور پاکستان کا سب سے قابل اعتماد شراکت دار اور سب سے مضبوط حامی رہے گا۔

ان خیا لات کا اظہار چینی وزیر خا رجہ نے پاکستان کے وزیر خارجہ شاہ محمود قریشی کے ساتھ ملاقات میں کیا، جو افغان ہمسایہ ممالک کے وزرائے خارجہ کے تیسرے اجلاس میں شرکت کیلئے چین تشریف لائے ہیں۔اس مو قع پر شاہ محمود قریشی نے وانگ ای کو پاکستان کے کامیاب دورے اور اسلامی تعاون تنظیم کے وزرائے خارجہ کے اجلاس میں شرکت پر مبارکباد دی۔ انہوں نے کہا کہ اسلامی ممالک نے اجلاس میں چین کی شرکت کو سراہا اور چین کے ساتھ تعلقات کے فروغ کا متفقہ طور پر خیرمقدم کیا ہے۔
انہوں نے کہا کہ پاکستان اور چین ایک دوسرے کو مایوس نہیں کریں گے۔ فریقین نے چین پاکستان اقتصادی راہداری کی اعلیٰ معیار کی ترقی کو جاری رکھنے پر اتفاق کیا۔ دونوں رہنماوں نے یوکرین کے معاملے پر بھی تبادلہ خیال کیا۔