اسلام آباد (نیوز ڈیسک) سابق وزیر اعظم اور چیئرمین تحریک انصاف عمران خان کا کہنا ہے کہ مشکل حالات کے باوجود علی پور کا جلسہ بڑے پیمانے پر ہوا۔ ضمنی انتخابات کا جوش اس سے بھی زیادہ ہے جو میں نے 2018 کے عام انتخابات میں دیکھا تھا۔عمران خان نے سماجی رابطے کی ویب سائیٹ ٹویٹر پر کہا کہ میں ان تمام لوگوں کا شکریہ ادا کرنا چاہتا ہوں جو پنجاب میں بارشوں کے باوجود ہمارے جلسوں میں حمایت کا اظہار کرنے کے لیے باہرآ رہے ہیں۔

واضح رہے کہ گزشتہ دنوں عمران خان نے جلسے سے خطاب میں کہا کہ گھی اور آٹا سمیت سب کچھ مہنگا ہو گیا۔سابق وزیر اعظم اور تحریک انصاف کے سربراہ عمران خان کی جانب سے حکومت کو شدید تنقید کا نشانہ بنایا گیا۔

سابق وزیر اعظم نے کہا کہ امپورٹڈ حکومت آنے کے بعد پٹرول فی لٹر 100 روپے مہنگا کیا گیا،فضل الرحمن پٹرول سے بھی زیادہ بڑھ گیا،45 فیصد گیس کی قیمتوں میں اضافہ ہوا، گھی اور آٹا سمیت سب کچھ مہنگا ہو گیا۔

ہم کسی سے لڑائی نہیں چاہتے،امریکا کو آزاد خارجہ پالیسی لانے والا وزیراعظم پسند نہیں آیا،ایسی خارجہ پالیسی چاہتے تھے جو ہمارے لوگوں کے مفادات کی حفاظت کرے۔انکا کہنا تھا کہ میں نے امریکا کو کہا امن میں آپ کے ساتھ ہیں لیکن جنگ میں نہیں، امریکا کو اڈے دینے سے انکار کیا۔عمران خان نے الزام عائد کیا کہ میر جعفر اور میر صادق یہاں سازش کر کے ہماری حکومت گرائی۔
انہوں نے اپنے منحرف اراکین اسمبلی کو بھی شدید تنقید کا نشانہ بنایا۔عمران خان نے کہا کہ لوٹو، تم عوام میں جاؤ گے تو تین نعرے سنو گے لوٹا، چور اور غدار۔ عمران خان کا کہنا تھا کہ ایک وقت تھا لوٹوں کو چھانگا مانگا اور مری لے جایا کرتے تھے، لیکن اب لوٹوں کو نہیں پتہ اب زمانہ بدل چکا ہے، موبائل فون نے دنیا بدل ہے،سوشل میڈیا نے سب کچھ بدل دیا ہے۔ عمران خان نے اپنے امیدوار شبیر اعوان کو مخاطب کرتے ہوئے کہا کہ الیکشن والے دن آپ نے ہر پولنگ پر پہرہ دینا ہے