راولپنڈی (نیوز ڈیسک) آرمی چیف جنرل قمر جاوید باجوہ کی زیر صدارت کور کمانڈرز کانفرنس میں ملکی سرحدوں، داخلی اور مجموعی سیکیورٹی صورتحال پر غور کیا گیا ، انسداد دہشت گردی آپریشن کی کامیابیوں کی تعریف اور سرحدوں کے دفاع اور عوام کے تحفظ کیلئے جانیں قربان کرنیوالے افسروں اور جوانوں کو خراج تحسین پیش کیا ۔
آئی ایس پی آر کے مطابق آرمی چیف جنرل قمر جاوید باجوہ کی زیرصدارت 249 ویں کور کمانڈرز کانفرنس جی ایچ کیو راولپنڈی میں منعقد ہوئی، کانفرنس کے شرکاء نے سرحدی اور داخلی سلامتی سمیت مجموعی سیکورٹی صورتحال کا جائزہ لیا۔ آرمی چیف جنرل قمر جاوید باجوہ نے انسداد دہشت گردی آپریشنز کی کامیابیوں کوسراہا اور سرحدوں کی حفاظت اور عوام کی حفاظت کو یقینی بنانے کے لئے افسران اور جوانوں کی قربانیوں کو زبردست خراج تحسین پیش کیا۔
آرمی چیف جنرل قمر جاوید باجوہ نے ملک میں سیلاب اور شدید بارشوں سے متاثرہ لوگوں کے مشکلات کم کرنے کے لئے جاری امدادی کارروائیوں میں فارمیشنز کی ریلیف کی کوششوں کی بھی تعریف کی، فورم نے مسلح افواج کے ریسکیو اور بحالی کے کاموں میں سول انتظامیہ کو مکمل تعاون فراہم کرنے کے عزم کا اعادہ کیا۔