اسلام آباد(نیوز ڈیسک) پاکستان تحریک انصاف کے جنرل سیکرٹری پنجاب سابق وزیر توانائی حماد اظہر نے کہا ہے کہ شہبازشریف دیوالیہ کا خطرہ بڑھنے پرتقریر نہیں آپ کا استعفا ضروری ہے، معاشی تباہی، لوڈشیڈنگ، مہنگائی کیلئے آپ کا 3 ماہ کا دور تاریک ترین رہا۔انہوں نے ٹویٹر پر وزیراعظم شہباز شریف کی ایوان میں تقریر پر اپنے ردعمل میں کہا کہ شہباز شریف صاحب، آپ کے 3 ماہ کا دور تاریک ترین رہا۔
معاشی تباہی، لوڈشیڈنگ، مہنگائیی، پرامن شہریوں پر ظلم آپ کے تحفے ہیں۔ کیا آپ کو اندازہ ہے کے ڈالر 3 ماہ میں 53 روپے مہنگا ہو گیا؟ انہوں نے کہا کہ کیا آپ کو علم ہے کہ ڈیفالٹ رسک آپ کے دور میں 4 گنا بڑھ چکا ہے؟ جلسے کی تقریر نہیں آپ کا استعفا ضروری ہے۔

اسی طرح ترجمان پی ٹی آئی فواد چودھری نے وزیراعظم شہباز شریف کی ایوان میں تقریر پر اپنے ردعمل میں کہا کہ شہباز شریف کو لگتا ہے کہ ان کے کیس کا پتا ہی نہیں اور نہ انہوں نے ایکٹ دیکھا ہے، جو فیصلہ ان کی مرضی کا آتا ہے اس پر مٹھائیاں بانٹتے ہیں۔

انہوں نے کہا کہ شہبازشریف نے عدلیہ پر تنقید کی اور چاہتے ہیں کہ ٹکراؤ کی فضا پیدا ہو، ادروں کے ساتھ ٹکرانے کی کوشش کی تو اب عوام کھڑی ہوگی۔ ہم سمجھ رہے تھے کہ اسمبلی میں حکومت ریلیف دینے یا معیشت کی بات کرے گی۔مزید برآں پاکستان مسلم لیگ ق کے مرکزی رہنماء چودھری مونس الٰہی نے ٹویٹر پر وزیرداخلہ رانا ثناء اللہ کے بیان پر اپنے ردعمل میں کہا کہ رانا ثناءاللہ صاحب! چودھری پرویزالٰہی کو حلف لیے 24 گھنٹے بھی نہیں ہوئے اور آپ کی ہوائیاں پہلے ہی اڑ گئی ہیں۔
گورنر رُول کے بارے میں احمقانہ بیان دینے سے پہلے آئین پڑھ لیں ۔ انہوں نے کہا کہ ابھی تو ماڈل ٹاؤن میں جو قتل عام آپ نے کیا تھا اس کا حساب دینا ہے۔ یاد رہے وزیرداخلہ رانا ثناءاللہ کا کابینہ اجلاس سے متعلق کہنا ہے کہ اگر وزیراعظم گورنر راج کی ایڈوائس کرتے ہیں تو صدر مملکت کا کوئی استحقاق نہیں ہے بلکہ اس پر عمل کرنا ہے، عمل نہیں کریں گے تو 10 دن بعد اس پر عملدرآمد ہوجائے گا۔
اگر کوئی صوبائی حکومت وزیر داخلہ کے داخلے پر پابندی عائد کرتی ہے تو جواز کافی ہے کہ صوبے میں گورنر راج نافذ کر دیا جائے۔ اس سے قبل وزیر داخلہ رانا ثنا ء اللہ نے پنجاب میں گورنر راج لگانے کی دھکمی دی،رانا ثناء اللہ نے کہا پنجاب میں گورنر راج کی سمری پر وزارت داخلہ نے کام شروع کردیا ہے۔ پنجاب میں میرے داخلے پر پابندی گورنر راج کا جواز ہوگا۔
انہوں نے پریس کانفرنس کرتے ہوئے کہا کہ مجھ پر پنجاب میں داخلے کی پابندی کی بات ہوئی تو گورنر راج کی سمری میں نے ہی پیش کرنی ہے۔ وزیرداخلہ نے کہا کہ گورنر راج کی سمری وزارت داخلہ نے شائع کرنی ہے، گورنر راج پر گفتگو کرنے والے آوارہ گفتگو کے عادی ہیں۔ سپریم کورٹ کے فیصلے سے سیاسی صورتحال خراب ہوئی، کوئی یہ نہیں کہہ رہا کہ اختیارات پارلیمان کو دے دیا جائے، عدلیہ کے اختیارات کی کمی کی کوئی بات نہیں کر رہا۔
رانا ثناءاللہ کا کہنا تھا کہ یہ مسلم لیگ ن یا سیاستدانوں کا مسئلہ ہے، ہمیں اپنی ذمہ داری پوری کرنی چاہیے۔ ایک غیر جانبدار عدلیہ ہر ملک اور معاشرے کی بنیادی ضرورت ہے،جبکہ ہم اپنے الفاظ محدود رکھتے ہیں۔ انہوں نے کہا کہ عدلیہ کا احترام ہر معاشرے کے لیے ضروری ہے۔ ڈالر کا ریٹ کیوں بڑھ رہا ہے؟ ایسا کرینگے تو سیاسی عدم استحکام تو آئے گا۔ انہوں نے کہا کہ اس فیصلے کی روح سے وہ 25 لوگ بحال ہوگئے ہیں،کبھی ایسا نہیں ہوتا،پر فیصلہ دیا گیا جبکہ 25 ووٹ مائنس کر دیے گئے۔ رانا ثناء اللہ کا کہنا تھا کہ قومی اسمبلی میں ووٹ گنے جانے کا فیصلہ اسی سپریم کورٹ نے آبزرو کیا تھا۔