لاہور (نیوزڈیسک) حکومت نے تمام پٹرولیم مصنوعات مزید مہنگی کر دیں۔ تفصیلات کے مطابق وفاقی حکومت نے تمام پٹرولیم مصنوعات کی قیمتوں میں اضافے کا اعلان کردیا۔ اوگرا کی سمری پر غور کے بعد وزیر اعظم شہباز شریف نے پٹرولیم مصنوعات کی قیمتوں میں اضافے کی منظوری دی۔ بتایا گیا ہے کہ وفاقی حکومت نے یکم ستمبر 2022 سے پٹرول 2 روپے 99 پیسے، مٹی کا تیل 10 روپے 92 پیسے، ہائی اسپیڈ ڈیزل 2 روپے 99 پیسے جبکہ لائٹ اسپیڈ ڈیزل 9 روپے 79 پیسے مہنگا کر دیا۔
یوں پٹرول مہنگا ہوکر 235.98 روپے، ڈیزل 247 روپے 43 پیسے، مٹی کا تیل 210 روپے 32 پیسے جبکہ لائٹ اسپیڈ ڈیزل 201 روپے 54 پیسے کا ہو گیا۔ نئی قیمتوں کا اطلاق فوری طور پر کر دیا، یہ قیمتیں 15 ستمبر تک برقرار رہیں گی، جس کے بعد 16 ستمبر سے نئی قیمتوں کے حوالے سے دوبارہ غور کیا جائے گا۔

واضح رہے کہ حکومت کے اعلان سے قبل ہی ستمبر کے پہلے 15 ایام کیلئے بیشتر پٹرولیم مصنوعات کی قیمتوں میں اضافہ کیے جانے کا امکان ظاہر کیا گیا تھا۔

ذرائع نے بتایا تھا کہ پٹرولیم لیوی میں اضافہ کیے جانے کا امکان ہے جس سے پٹرولیم مصنوعات مہنگی ہو جائیں گی، بتایا گیا کہ پٹرول کی قیمت میں کچھ کمی ہو سکتی ہے، جبکہ ڈیزل اور دیگر مصنوعات کی قیمتوں میں اضافے کا امکان ہے۔ تاہم حکومت کی جانب سے پٹرولیم لیوی میں اضافہ کیے جانے کی صورت میں پٹرول کی قیمت میں بھی کمی نہ ہونے کا امکان ظاہر کیا گیا۔
سما نیوز کی رپورٹ کے مطابق اوگرا نے پٹرول 2 روپے 98 پیسے سستا کرنے جبکہ ڈیزل 8روپے، مٹی کا تیل 16روپے اور لائٹ اسپیڈ ڈیزل 12 روپے مہنگا کرنے کی سفارش کی۔ دوسری جانب اوگرا نے بدھ کے روز ماہ ستمبر کے آغاز سے قبل ایل پی جی کی فی کلو قیمت میں کمی کا اعلان کر دیا۔ اوگرا اعلامیہ کے مطابق ماہ ستمبر کیلئے ایل پی جی کی فی کلو قیمت میں 6 روپے کمی کر دی گئی جس کے بعد نئی قیمت 212 روپے ہو گئی۔ فی کلو قیمت میں کمی کے بعد ایل پی جی کا گھریلو سلنڈر 2571 روپے سے کم ہو کر 2496 روپے جبکہ کمرشل سلنڈر 9891 روپے سے کم ہو کر 9604 روپے کا ہو گیا۔