گجرات (نیوزڈیسک) عمران خان کا کہنا ہے کہ اپنے حربے چھوڑ دو ورنہ ہماری تحریک اسلام آباد کی طرف آئے گی اور آپ کو چھپنے کی جگہ نہیں ملے گی، نوجوانوں تیار ہو جاؤ ہم نے ظلم کا مقابلہ کرنا ہے، یہ ہمارے خلاف جتنی ایف آئی آر کاٹیں گے کوئی فائدہ نہیں ہوگا، پی ڈی ایم سمیت سب جو مرضی کر لو اب جیت نہیں سکتے۔ تفصیلات کے مطابق گجرات میں منعقدہ تحریک انصاف کے جلسے سے خطاب کرتے ہوئے سابق وزیر اعظم عمران خان نے کہا کہ بھارت روس سے 40 فیصد کم قیمت پر تیل خرید سکتا ہے تو ہم کیوں نہیں؟ روس مجھے کم قیمت پر تیل دے تو میں کیوں نہ لوں؟ انہوں نے حکومت پر تنقید کرتے ہوئے کہا کہ یہ روس سے سستا تیل نہیں لیں گے کیونکہ امریکا ناراض ہوگا، انہیں جو حکم ملے گا یہ وہی کریں گے، چوروں کے ٹولے کو ہمارے اوپر مسلط کیا گیا۔

عمران خان نے کہا کہ ہماری حکومت میں پراپیگنڈا کیا گیا، یہ شور مچاتے تھے کہ پاکستان میں مہنگائی ہو گئی ہے، بلاول نے ڈرانے کیلئے مہنگائی مارچ کیا بولے عمران خان کی کانپیں ٹانگیں گی، شہباز شریف ہر روز کہتے تھے تم آئی ایم ایف کے غلام بن گئے ہو، لیکن ہم پر الزام لگانے والے آج خود آئی ایم ایف کے سامنے ڈھیر ہوگئے، جب یہ اقتدار سے باہر تھے تو آئی ایم ایف بہت برا تھا اور اب بہت اچھا ہوگیا۔
چئیرمین تحریک انصاف نے کہا کہ دنیا سے عزت کروانی ہے تو اپنی عزت خود کریں، غلام قوم کبھی آگے نہیں بڑھ سکتی، ہم اپنی عزت نہیں کرتے اس لئے سبز پاسپورٹ کی عزت نہیں ہوتی۔ عمران خان نے الزام عائد کیا کہ امپورٹڈ حکومت مہنگائی کم کرنے نہیں بلکہ اپنے کرپشن کیسز ختم کرنے آئی ، آج مہنگائی کہاں سے کہاں پہنچ گئی، ہمارے دور میں بجلی 18 روپے کی تھی جبکہ آج 36 روپے یونٹ ہے، ہماری حکومت کو سازش کے تحت ہٹایا گیا تو پٹرول 150 روپے اور ڈیزل 145 روپے تھا، مجھے معلوم ہے کہ ڈیزل کی قیمتیں کہاں سے کہاں چلی گئیں، جب ڈیزل مہنگا ہوتا ہے تو سب کچھ مہنگا ہو جاتا ہے، اب آئی ایم ایف کے حکم پر 230 روپے لیٹر ہوگیا ہے، آج عالمی مارکیٹ میں تیل کی قیمت 96 ڈالر ہے تو ملک میں تیل مہنگا کیوں ہے؟ ہم بھی آئی ایم ایف پروگرام میں تھے لیکن ہم نے مہنگائی کو کنٹرول کیا تھا، آج اتنی مہنگائی کیوں ہوگئی؟۔
عمران خان نے کہا کہ سب سے پہلے ہمیں خود کو آزاد کرنا ہے، سب سے پہلے ہم نے اس ملک کے انصاف کے نظام کو ٹھیک کرنا ہے، حقیقی آزادی تک قوم کی پرواز اوپر نہیں جاتی، غلام اوپر نہیں جا سکتے، غلام صرف اچھے غلام بن سکتے ہیں لیکن آزاد انسان اقبال کے شاہین بن سکتے ہیں، قائداعظم ایک غلام ہندوستان میں آزاد انسان تھے، عزت پیسے سے نہیں مل سکتی، دنیا سے عزت کروانی ہے تو اپنی عزت خود کریں، ہم نے اپنے لوگوں کو حقوق دینے ہیں۔
سابق وزیر اعظم نے کہا میں قوم کو جگانے کی کوشش کر رہا ہوں، قوم میں شعور آ چکا ہے اس کے بعد انقلاب آئے گا، وہ انسان ترقی کرتا ہے جو بڑا خواب دیکھتا ہے، بڑی کامیابی کے لیے بڑا خواب دیکھنا ضروری، حقیقی آزادی کی جدوجہد کو منطقی انجام تک پہنچائیں گے۔