اسلام آباد (نیوز ڈیسک) صدرمملکت عارف علوی نے یوم دفاع و شہدا کے حوالے سے قوم کے نام پیغام جاری کیا اور کہا کہ پاکستان عالمی اور علاقائی امن کے لیے پر عزم ہے۔ پاکستان پر امن بقائے باہمی کی پالیسی پر عمل پیرا ہے،امن کی خواہش کو ہماری کمزوری ہر گز نہ سمجھا جائے۔ ہم اپنی قومی اور بین الاقوامی ذمہ داریوں سے بخوبی آگاہ ہیں۔
میڈیا رپورٹس کے مطابق صدر مملکت نے کہا کہ ہماری مسلح افواج کسی بھی قسم کے حالات سے نمٹنے کے لیے تیار ہے،یوم دفاع و شہدا ہمیں اس بے مثال جرات اور بہادری کی یاد دلاتا ہے جس کا مظاہرہ مسلح افواج اور قوم نے دشمن کے ناپاک عزائم کو ناکام بنا کر کیا تھا۔ انکا کہنا تھا کہ آزمائش کی گھڑی میں افواج پاکستان نے بری،بحری اور فضائی جنگ بے خوفی سے لڑیں،قوم کا ہر شہری مادر وطن کی حفاظت کیلئے اٹھ کھڑا ہوا،6 ستمبر غیر متز لزل عزم،جذبہ حب الوطنی اور عظیم قربانی کی علامت ہے۔

دوسری جانب وزیراعظم شہبازشریف نے یوم دفاع و شہدا پاکستان کے موقع پر اپنے پیغام میں کہا کہ ہماری بہادر فوج نے ثابت کیا وہ وطن کے دفاع کیلئے ہر وقت تیار ہیں۔6 ستمبر کا دن دھرتی کے بہادر بیٹوں کی عظیم قربانی کے جذبے کی یاد کے طور پر منایا جاتا ہے۔57 سال قبل ہماری بہادر افواج نے ثابت کر دیا کہ مادرِ وطن کے دفاع کیلئے ہمہ وقت تیار ہیں،قوم اس سر زمین کے بہادر بیٹوں کو خراج عقیدت پیش کر رہی ہے۔
وزیراعظم شہباز شریف کا کہنا تھا کہ یہ ہیروز سخت موسموں میں مادرِ وطن کی سرحدوں کو بیرونی اور اندرونی خطرات سے محفوظ رکھتے ہیں،ہماری بہادر مسلح افواج نے دہشت گردی کے عفریت کو شکست دے کر 1965 کی جنگ کے قابل فخر ورثے کو آگے بڑھایا۔ انہوں نے مزید کہا کہ حالیہ سیلاب میں ہزاروں لوگوں کی جانیں بچانے میں مسلح افواج اور دیگر اداروں کے اہلکاروں کے کردار کو سراہتا ہوں۔پاکستان مشکل معاشی صورتحال کے باوجود اپنے دفاع کی مضبوطی سے غافل نہیں رہ سکتا۔