اسلام آباد (نیوز ڈیسک) اسلام آباد کی سیشن عدالت نے خواجہ آصف کے خلاف ہرجانہ کیس میں التوا مانگنے پر عمران خان پر 5 ہزار روپے جرمانہ عائد کردیا۔ ایکسپریس نیوز کے مطابق عدالت میں وزیر دفاع خواجہ آصف کے خلاف 10 ارب روپے ہرجانے کے کیس سے متعلق سماعت ہوئی،ایڈیشنل سیشن جج عدنان خان نے کیس کی سماعت کی۔ چیئرمین تحریک انصاف عمران خان کی جانب سے جلسوں میں مصروفیات کے باعث التوا کی درخواست دائر کی گئی۔
خواجہ آصف کے وکیل علی شاہ گیلانی ایڈووکیٹ عدالت میں پیش ہوئے تاہم التوا کی درخواست کے باعث ان کی عمران خان کے بیان پر جرح مؤخر کردی گئی۔ عدالت نے عمران خان کے وکلا کی جانب سے سماعت ملتوی کرنے کی استدعا منظور کرتے ہوئے ان پر 5 ہزار روپے جرمانہ عائد کردیا۔

عدالت نے عمران خان کی جانب سے خواجہ آصف کے خلاف 10 ارب روپے ہرجانے کے دعویٰ کے کیس کی سماعت 24 ستمبر تک ملتوی کردی۔

واضح رہے کہ اس سے پہلے چیئرمین تحریک انصاف عمران خان نے پولیس کی جے آئی ٹی کو بیان جمع کرایا،عمران خان نے کہا کہ تقریر میں جو کچھ کہا دہشت گردی کے زمرے میں نہیں آتا،کوئی غیرقانونی عمل کیا نہ ہی کسی کو نقصان پہنچایا، میں بےگناہ ہوں مقدمہ خارج کیا جائے۔ چیئرمین پی ٹی آئی عمران خان کیخلاف خاتون جج کو دھمکیاں دینے پر دہشتگردی کا مقدمے سے متعلق اہم پیشرفت ہوئی ، چیئرمین تحریک انصاف عمران خان نے پولیس کی جے آئی ٹی کو بیان جمع کروا دیا ہے، عمران خان نے اپنے وکیل انتظار حسین ایڈووکیٹ کے ذریعے جواب جمع کروایا۔
عمران خان نے جواب میں بتایا کہ تحریک انصاف کا چئیرمین ہوں اور پاکستان کا وزیراعظم رہ چکا ہوں، حکومت نے سیاسی مخالفت کی وجہ سے شہباز گل پر تشدد کیا، اسلام آباد ہائیکورٹ میں داخل رپورٹ میں شہباز گل پر تشدد ثابت ہوا، تقریر میں جو کچھ کہا دہشت گردی کے زمرے میں نہیں آتا۔