لاہور (نیوز ڈیسک) چیف سیکرٹری پنجاب کامران علی افضل کا کہنا ہے کہ صوبے میں سیاسی مداخلت بہت زیادہ ہے،کسی افسر کی مدت پوری نہیں ہونے دی جاتی۔ جیو نیوز کے مطابق چیف سیکرٹری پنجاب کامران علی افضل کی زیرصدارت آل سیکرٹریز کانفرنس ہوئی۔ چیف سیکرٹری پنجاب نے خطاب میں کہا کہ میں کسی میوزیکل چیئر کا حصہ نہیں بننا چاہتا۔
ذرائع کا حوالہ دیتے ہوئے رپورٹ کیا گیا کامران افضل نے کہا وزیراعظم شہباز شریف سے ملاقات کرکے درخواست کی کہ میری خدمات واپس لی جائیں جس پر شہبازشریف نے کہا تھا کہ 13 ستمبر تک کسی اور کو چیف سیکرٹری تعینات کردیں گے۔ذرائع کا حوالہ دیتے ہوئے مزید رپورٹ کیا گیا کہ چیف سیکرٹری پنجاب نے ملاقات کو الوداعی قرار دیا اور کہا میں نے کوشش کی افسران کے ساتھ ٹیم بن کر کام کیا جائے لیکن حالات ایسے نہیں پنجاب میں مزید کام جاری رکھ سکوں۔

کامران علی افضل نے کہا میرا وفاقی اسٹیبلشمنٹ ڈویژن سے بھی رابطہ ہوا ہے،میری خدمات جلد واپس لے لی جائیں گی۔ واضح رہے کہ اس سے پہلے چیف سیکرٹری پنجاب کامران علی افضل نے وفاقی حکومت سے رابطہ کیا۔الیکشن ملتوی ہونے پر چیف سییکرٹری پنجاب نے وفاق کو پھر خط لکھا۔ چیف سیکرٹری پنجاب کامران علی افضل نے وفاق سے کہا ہے کہ 6 اگست کے خط پر غور کیا جائے اور میری خدمات وفاقی حکومت واپس لے،پنجاب میں مزید کام جاری نہیں رکھنا چاہتا۔
وفاق نے بھی نئے چیف سیکرٹری پنجاب کے ناموں پر غور شروع کر دیا ہے۔ قبل ازیں چیف سیکرٹری پنجاب کامران علی افضل نے اپنی خدمات واپس لینے کیلئے وفاقی حکومت کو خط لکھا،کامران علی افضل کی جانب سے لکھے گئے خط میں ذاتی وجوہات کی بنا پر کام جاری نہ رکھنے کے بارے میں آگاہ کیا گیا۔چیف سیکرٹری نے اسٹیبلمنٹ ڈویژن سے اپنی خدمات پنجاب سے واپس لینے کی درخواست کرتے ہوئے مؤقف پیش کیا کہ ذاتی وجوہات کی بنا پر پنجاب میں اپنی خدمات مزید جاری نہیں رکھ سکتا۔