لاہور(نیوزڈیسک) پنجاب حکومت نے صوبے بھر میں پتنگ بازی پر دفعہ144 نافذ کردی، پنجاب بھر میں پتنگ بازی کا سازوسامان بنانے اور فروخت کرنے پر مکمل پابندی عائد ہوگی، خلاف ورزی پر قانونی کاروائی کی جائے گی۔ تفصیلات کے مطابق پنجاب حکومت نے صوبے بھر میں پتنگ بازی پر دفعہ144 نافذ کردی، جس کا نوٹیفکیشن بھی جاری کردیا ہے، دفعہ 144 کا نفاذ پنجاب کے تمام اضلاع میں ہوگا۔
پنجاب بھر میں پتنگ بازی کا سازوسامان بنانے پر مکمل پابندی ہوگی، اسی طرح پتنگ سازی کیلئے استعمال ہونے والے سازوسامان کی فروخت پر بھی پابندی عائد کردی گئی ہے۔خلاف ورزی پر قانونی کاروائی عمل میں لائی جائے گی۔ مزید ڈی آئی جی آپریشنز لاہور افضال احمد کوثر کی ہدایت پر پتنگ بازی کے تدارک کے لیے ڈویژنز کی تمام ٹیمیں متحرک ہوگئی ہیں، ہفتہ اور اتوار کے روز رات کو خصوصی طور پر پتنگ بازوں پر کڑی نظر رکھی جارہی ہے۔

شہریوں کی زندگی محفوظ بنانے کیلئے پتنگ بازی جیسے خونی کھیل کے خلاف کریک ڈاون جاری رکھا جائے گا۔ ذمہ داروں کےخلاف سخت قانونی کاروائی کی جائیگی۔مزید برآں نگران وزیراعلیٰ پنجاب محسن نقوی کی زیر صدارت صوبائی کابینہ کا 7 واں اجلاس ہوا۔ اجلاس میں وزیراعظم کی کفایت شعاری پالیسی کے اقدامات پرصوبائی سطح پر عملدرآمد کا فیصلہ کیا گیا۔
نگران وزیراعلیٰ محسن نقوی نے ہر سطح پر کفایت شعاری اپنانے کیلئے جامع پلان طلب کرلیا ہے۔ اجلاس میں کہا گیا کہ افسران ترکیہ اور شام کے زلزلہ متاثرین کی امداد کیلئے ایک سے 3 دن کی تنخواہ عطیہ کرینگے۔ اجلاس میں گندم کی کم ازکم امدادی قیمت 3900 روپے فی من مقرر کرنے کی تجویز دی گئی۔ اجلاس میں فارن فنڈڈ پراجیکٹس کی تیزی سے تکمیل یقینی بنانے کیلئے فارن فنڈڈ پراجیکٹ کمیٹی کے قیام کی منظوری دی گئی۔
اسی طرح کارپوریٹ ایگریکلچر فارمنگ کیلئے سرکاری اراضی کو سنگل سورس کی بنیاد پر لیز پر دینے کی منظوری دی گئی۔ لیز پر دی جانے والی اراضی صرف زرعی مقاصد کے لئے استعمال ہوسکے گی۔ اجلاس میں پولیس شہداء پیکیج کے لئے 400 ملین روپے کی ضمنی گرانٹ کی منظوری بھی دی گئی۔ نگران وزیراعلیٰ پنجاب محسن نقوی کی زیر صدارت صوبائی کابینہ اجلاس میں فیصلہ کیا گیا کہ الائیڈ اسپتال فیصل آباد میں فرینڈز آف الائیڈ اسپتال کے تعاون سے نیا ایمرجنسی بلاک بنایا جائے گا۔ کابینہ اجلاس میں ٹورازم ڈیپارٹمنٹ کا نام ٹورازم آرکیالوجی اینڈ میوزیم ڈیپارٹمنٹ رکھنے کی منظوری بھی دی گئی۔