لاہور (نیوزڈیسک) سابق گورنرپنجاب چوہدری سرور نے مسلم لیگ ق میں شمولیت کا اعلان کردیا ، کہتے ہیں کہ ہماری حکومت آئی تو 5 برس میں ملک کا قرض اتار کر دکھاؤں گا۔ تفصیلات کے مطابق سابق گورنر پنجاب چوہدری سرور نے مسلم لیگ ہاؤس لاہور میں ایک پریس کانفرنس میں باقاعدہ شمولیت کا اعلان کیا، جہاں چوہدری شجاعت حسین ، طارق بشیر چیمہ، چوہدری شافع حسین،طارق حسن اور مصطفیٰ ملک بھی سٹیج پر موجود تھے، اس موقع پر چوہدری سرور کا کہنا تھا کہ چوہدری شجاعت نے مسلم لیگ ق میں شمولیت کی دعوت دی، دوستوں سے مشاورت کی تو سب نے کہا چوہدری شجاعت حسین کے ساتھ چلیں وہ وضع دار انسان ہیں ، چوہدری شجاعت حسین نے ہمیشہ سیاستدانوں کو جوڑنے کا کام کیا لیکن اس وقت ملک کے خراب حالات کے باوجود سیاستدان اکٹھے بیٹھے کو تیار نہیں، ملک کو مسائل سے نکالنے اور خوشحالی کے لیے اکٹھے بیٹھنا ہو گا، میں ملک کی تمام قوتوں کو دعوت دیتا ہوں کہ آئیے مل کر ملک کی تعمیر و ترقی کا آغاز کریں۔

سابق گورنر پنجاب نے کہا کہ اقتدار کا فیصلہ عوام نے کرنا ہے وہ جسے چاہیں منتخب کریں، میں نے جہاں سیاست کی وہاں پارٹی ممبران ٹکٹ دینے کا فیصلہ کرتے ہیں، یورپ میں پارٹی چیئرمین کسی کو ٹکٹ نہیں دے سکتا ، ریسکیو 1122 کا ادارہ بنانے میں بھی میرا کردار تھا، ہماری حکومت آئی تو 5 برس میں ملک کا قرض اتار کر دکھاؤں گا، تعلیم صحت زراعت سمیت تمام شعبوں کو ترقی دیں گے، ملک میں انصاف لانے کے لیے پولیس اصلاحات کی ضرورت ہے، ہر ادارہ اپنی حدود میں رہ کر خود کو درست کرے۔
اس دوران سربراہ مسلم لیگ ق چوہدری شجاعت حسین نے کہا کہ چوہدری سرور کی پارٹی میں شمولیت پر مشکور ہوں، ملک اس وقت بہت سے مسائل کا شکار ہے، چوہدری سرور کی باتوں سے محسوس ہوا کوئی دل سے کہہ رہا ہے، چودھری سرور ایک ایماندار آدمی ہیں۔