کراچی (نیوزڈیسک) سابق وزیراعظم شاہد خاقان عباسی کا کہنا ہے کہ پارلیمنٹ مفلوج ہو کر رہ گئی ہے،ملکی حالات سے متعلق لاپرواہی کی جا رہی ہے۔ تفصیلات کے مطابق شاہد خاقان عباسی نے کراچی میں میڈیا سے گفتگو کرتے ہوئے کہا ہے کہ ہماری ایٹمی اثاثے ہماری سالمیت کا اہم جز ہیں،اسحاق ڈار نے اثاثوں سے متعلق کوئی ایسی بات کی ہے تو ان کیمرہ سیشن بلا کر حقائق عوام کو بتائیں۔
تمام ممالک اپنے اثاثوں کا تحفظ کرتے ہیں،حکمران ملکی مفادات کا تحفظ کریں،ہم نے ملکی صورتحال کی جانب توجہ دلانے کی کوشش کی،نہ ہم کسی کی تعریف کرتے ہیں نہ کسی پر تنقید کرتے ہیں۔ انہوں نے کہا کہ ہم مسائل کی نشاندہی کر رہے ہیں تاکہ حل نکل سکے،پارلیمنٹ میں ملکی مسائل پر بات کرنی چاہیے۔

عمران خان کو سیاست کے لیے موقع چاہیے،عمران خان پر حکومت سختی نہیں کرنا چاہتی تو اس کا فائدہ اٹھا کر وہ گھر بیٹھے ہیں،عمران خان عدالتوں میں جائیں اور ان کا سامنا کریں،عدالت نے وارنٹ جاری کیے وہاں پیش ہونا عمران خان کی ذمہ داری ہے۔

شاہد خاقان عباسی نے کہا کہ عمران خان دعوے کرتے رہے کہ میں نے ان لوگوں کو گرفتار کروایا،سیاست میں سیاستدانوں کو تکلیفیں پہنچتی ہیں۔نواز شریف بیرون ملک علاج کے لیے گئے ہیں اور سپریم کورٹ نے نواز شریف کو سیاست سے الگ کیا ہے،امید ہے انتخابات سے قبل نواز شریف واپس آجائیں گے۔ سابق وزیراعظم نے کہا کہ توشہ خانہ کسی کو تحفہ نہیں دیتا،یہ حکومت کا پیسہ نہیں ہے۔ شاہد خاقان عباسی نے پیٹرولیم مصنوعات کی قیمتوں میں اضافے سے متعلق کہا کہ پیٹرولیم مصنوعات کی قیمتوں میں اضافے کا حکومت سے کوئی تعلق نہیں،معیشت یہاں تک کیسے پہنچی اس کو دیکھنا ہو گا اور حل نکالنا پڑے گا۔