کراچی (نیوزڈیسک) گورنر سندھ کامران ٹیسوری کا کہنا ہے کہ ایک سیاسی جماعت کئی روز سے لاہور میں تماشا لگا کر بیٹھی ہے۔ تفصیلات کے مطابق گورنر سندھ کامران ٹیسوری نے تحریک انصاف کی قیادت کو تنقید کا نشانہ بناتے ہوئے کہا ہے کہ عمران خان جس ایجنڈے پر چل رہے ہیں اس کا مقصد پاکستان کو کمزور کرنا ہے۔ انہوں نے کراچی میں مزار قائد پر حاضری کے بعد میڈیا سے گفتگو میں کہا کہ ملک اور اداروں کو بدنام کرنے کی سازش کی جا رہی ہے،قوم اس سازش کو کامیاب نہیں ہونے دیں گے،افواج کیخلاف مہم ملک کو کمزور کرتی ہے۔
انکا کہنا تھا کہ قائد اعظم کے فرامین پر چل کر ہم ملک کو ترقی کی راہ پر گامزن کر سکتے ہیں،ہمیں ملکی معیشت کو مضبوط کرنا ہے۔ ہم سب ایک قوم ہو کر آگے بڑھیں گے،حکومت کی کوشش ہے مہنگائی کے اس طوفان میں عوام کو زیادہ سے زیادہ ریلیف دیں۔

کچھ چیزوں میں عدم استحکام ہے اور معیشت میں بھی عدم استحکام ہے،ہمیں ملک کی چاروں اکائیوں کو مضبوط کرنا ہے۔

قبل ازیں کامران ٹیسوری کا کہنا تھا کہ ہم کب تک برادر ممالک سے ٹیکسز کی چھوٹ مانگتے رہیں گے ماضی میں حکومتوں نے آئی ایم ایف سے قرض لے کر سرمایہ کاری نہیں کی بلکہ مزید قرض کیلئے آئی ایم ایف کے سامنے ہاتھ پھیلائے،ہمیں اپنے پیروں پر کھڑا ہونا ہے اور اس کیلئے ہرفرد کو اپنا کردار ادا کرنا ہو گا،ہمارا پڑوسی ملک بھارت 650 بلین ڈالر اور بنگلہ دیش90 بلین ڈالرز سے بھی زائد کا زرمبادلہ رکھتا ہے۔
گورنر سندھ نے کہا کہ ہم ابھی تک قرضے اتارنے کیلئے قرضے مانگ رہے ہیں،ماضی میں بھی تماشہ دیکھتے رہے اور آج بھی یہی عمل جاری ہے،پاکستان کے بہتر مستقبل کیلئے نظام اور سسٹم سے الجھنا ہو گا۔ حکومت کی پوری توجہ معیشت میں استحکام لانے پر مرکوز ہے، ملک کے موجودہ معاشی حالات ہم سب کی توجہ کے متقاضی ہیں۔