اسلام آباد (نیوزڈیسک) امریکی رکنِ کانگریس بریڈ شرمین اور چئیرمین پی ٹی آئی عمران خان کے مابین ٹیلیفونک رابطہ ہوا ہے۔جنگ اخبار کی رپورٹ کے مطابق امریکی رکن کانگریس بریڈ شرمین نے اس حوالے سے بتایا کہ ان کی عمران خان سے سپریم کورٹ کے گذشتہ روز کے فیصلے پر گفتگو ہوئی۔بریڈ شرمین نے یہ بھی بتایا کہ عمران خان نے ڈاکٹر آصف محمود سے بھی بات کی۔
کچھ دن قبل بریڈ شرمین نے صحافی ارشد شریف اور ظلِ شاہ کی اموات کی شفاف تحقیقات کا مطالبہ کہا تھا ۔بریڈ شرمین نے امریکی ڈیموکریٹ پارٹی کے رکن ڈاکٹر آصف محمود سے ملاقات کے بعد ویڈیو بیان میں کہا کہ ڈاکٹر آصف محمود پاکستان میں حالیہ پیش رفت پر بات کرنے کے لیے میرے گھر آئے۔انہوں نے کہا ہے کہ عمران خان سے فون پر بات ہوئی ہے اور خوشی ہے کہ سابق وزیرِ اعظم نے مسائل پر گفتگو کی۔

امریکی کانگریس کے رکن کا کہنا تھا کہ حال ہی میں پاکستان میں ہونے والے دہشت گردی کے واقعات پر امریکا میں تشویش ہے۔ان کا کہنا تھا کہ امریکا پاکستان میں جمہوریت اور جمہوری حقوق کی مکمل حمایت کرتا ہے۔بریڈ شرمین نے کہا ہے کہ شخصی آزادیوں پر قدغن کسی صورت نہیں ہونی چاہیے۔امریکی کانگریس کی خارجہ امور کمیٹی کے سینئر رکن نے عمران خان کی تقریر پر پابندیوں اور سیاسی سرگرمیوں کر روکنے پر بھی تشویش کا اظہار کیا ہے۔
خیال رہے کہ گذشتہ کچھ دنوں میں عمران خان سے امریکی سیاسی رہنماؤں کے رابطے تیز ہوئے ہیں۔علاوہ ازیں ٹائم میگزین نے اپنے سرورق پر عمران خان کی تصویر شائع کرتے ہوئے انہیں پاکستان کا مقبول ترین سیاستدان قرار دے دیا۔ ٹائم میگزین کی جانب سے سماجی رابطوں کی ویب سائٹ ٹویٹر پر اپنے ایک ٹویٹ میں کہا گیا کہ ٹائم میگزین نے اپنے سرورق پر عمران خان کی تصویر شائع کرتے ہوئے انہیں پاکستان کا مقبول ترین سیاستدان قرار دے دیا۔ میگزین کے مئی کے شمارے میں سابق وزیر اعظم عمران خان کا ایک خصوصی انٹرویو بھی شامل ہوگا۔