اسلام آباد (نیوزڈسیسک) وفاقی کابینہ نے الیکشن کمیشن کو پنجاب انتخابات کیلئے فنڈز فراہمی کا معاملہ پارلیمنٹ کو بھیجنے کی منظوری دے دی۔ تفصیلات کے مطابق وزیراعظم شہباز شریف کی زیر صدارت وفاقی کابینہ کا اجلاس ہوا،اجلاس میں موجودہ سیاسی صورتحال اور پنجاب انتخابات کیلئے فنڈز فراہمی کا معاملہ زیر غور آیا۔
وفاقی کابینہ نے الیکشن کمیشن کو پنجاب انتخابات کیلئے فنڈز فراہمی کا معاملہ پارلیمنٹ کو بھیجنے کی منظوری دے،وزرارت خزانہ کی سمری کی منظوری بھی دے دی گئی۔ الیکشن کمیشن کو فنڈز فراہمی کا معاملہ پارلیمنٹ میں پیش کرنے کا فیصلہ کیا گیا جبکہ وزرات خزانہ کی فنڈز فراہمی کی سمری قومی اسمبلی اجلاس میں پیش کی جائے گی۔ یاد رہے کہ گزشتہ روز بھی وزیراعظم شہباز شریف کی زیر صدارت وفاقی کابینہ کا اجلاس ہوا تھا جس میں ملک کی موجود سیاسی اور معاشی صورتحال پر غور کیا گیا، وفاقی کابینہ نے پارلیمنٹ کی بالادستی قائم رکھنے پر اتفاق کیا۔

وفاقی کابینہ نے انتخابات کیلئے الیکشن کمیشن کو فنڈز دینے کا معاملہ پارلیمنٹ لے جانے کا فیصلہ کیا تھا لاہور میں ہونے والے اجلاس میں بیشتر کابینہ اراکین ویڈیو لنک کے ذریعے شریک ہوئے، وفاقی وزیر ریاض پیرزادہ، ساجد طوری، وزیراعظم کے مشیر امیر مقام، وزیر ہاؤسنگ مولانا عبدالواسع، وزیر مملکت ہاشم نوتیزئی وزیراعظم ہاؤس میں موجود تھے جب کہ وفاقی وزراء ایازصادق، خواجہ سعد رفیق سمیت کابینہ کے چند اراکین لاہور میں موجود تھے، اجلاس کے شرکاء نے سپریم کورٹ پریکٹس اینڈ پروسیجر بل صدر مملکت کی جانب سے واپس بھجوانے کی مذمت کی، اس موقع پر وزیر اعظم شہباز شریف نے کہا کہ صدر کا کردار پی ٹی آئی کے ایک کارکن جیسا ہوچکا ہے، پارلیمنٹ سے منظور شدہ بل کو واپس بھجوانا بدقسمتی ہے،صدر کو آئین و قانون کی پاسداری کرنا چاہیے۔