اسلام آباد (نیوزڈیسک) چیف جسٹس پاکستان عمر عطا بندیال سمیت 4 ججز کے خلاف سپریم جوڈیشل کونسل میں شکایت دائر کر دی گئی۔جنگ اخبا رکی رپورٹ کے مطابق سردار سلمان ڈوگر ایڈوکیٹ نے جسٹس مظاہر نقوی کے خلاف شکایت درج کرائی۔ شکایت کی کاپیاں سپریم جوڈیشل کونسل کے دیگر ممبران کو بھی ارسال کر دی گئیں۔رپورٹ کے مطابق چیف جسٹس عمر عطا بندیال، جسٹس منیب اختر، جسٹس اعجاز الاحسن کے خلاف شکایت دائر کی گئی ہے جب کہ جسٹس مظاہر علی اکبر نقوی کے خلاف ایک اور شکایت دائر کرا دی گئی۔
درخواست میں استدعا کی گئی کہ چیف جسٹس عمر عطا بندیال سمیت چاروں ججز کو عہدے سے ہٹایا جائے، چاروں ججز مس کنڈکٹ کے مرتکب ہوئے۔درخواست میں موقف اپنایا گیا کہ چاروں ججز نے آرٹیکل 209 کی خلاف ورزی کی۔

غلام محمود ڈوگر اور صوبائی انتخابات کیس میں ججز نے مس کنڈکٹ کیا۔خیال رہے کہ سپریم کورٹ کے ججز میں اس وقت دراڑ دیکھنے میں آئی جب چیف جسٹس آف پاکستان نے پنجاب اور خیبرپختونخوا میں انتخابات تاخیر کا شکار ہونے پر از خود نوٹس لیا۔

پاکستان بار کونسل نے سپریم کورٹ میں جاری صورتحال پر تشویش کا اظہار کیا تھا۔ جمعہ کو پاکستان بار کونسل کی طرف سے جاری اعلامیہ میں کہا گیا تھا کہ سپریم کورٹ کے ججز میں تقسیم ادارے کے لیے نقصان دہ ہے،عدلیہ ریاست کا تیسرا ستون ہے،سپریم کورٹ آئینی ادارہ بھی ہے ،تنازعے کے حل کے لیے فل کورٹ میٹنگ بلائی جائے ،پاکستان بار کونسل سیاسی جماعتوں میں مذاکرات کرانے پر بھی تیار ہے،پی بی سی اعلامیہ میں کہا گیا ہے کہ سیاسی جماعتیں چاہیں تو آل پارٹیز کانفرنس بھی بلانے کو ٌتیار ہیں ،کانفرنس میں الیکشن سمیت تمام معاملات پر مذاکرات اور بحث ہو سکتی ہے۔