کراچی(نیوزڈیسک) کراچی سے لاہور جانے والی کراچی ایکسپریس میں آتشزدگی کا واقعہ پیش آیا ہے جس کے نتیجے میں 7 افراد جاں بحق ہو گئے،جاں بحق ہونے والے افراد میں بچے بھی شامل ہیں، وزارت ریلوے نے واقعے کا سخت نوٹس لیتے ہوئے تحقیقات کا حکم دے دیا۔۔میڈیا رپورٹس کے مطابق 26 اور 27 اپریل کی درمیانی شب ساڑھے 12 بجے کراچی سے لاہور جانے والی کراچی ایکسپریس کی اے سے بزنس کوچ نمبر 17 میں آگ لگنے کی اطلاع موصول ہوئی جس پر فوری طور پر گاڑی کو ٹنڈو مستی خان اسٹیشن کے قریب روک لیا گیا۔
ہنگامی طور پر فائر برییگیڈ کی اطلاع دی گئی جس کی پہلی گاڑی رات ایک بج کر 50 منٹ تک موقع پر پہنچی اور تقریبا 40 منٹ کی تگ و دو کے بعد آگ پر قابو پا لیا گیا۔واقعے میں سات مسافر جاں بحق ہو گئے، چار مسافر کوچ سے لاپتہ ہیں جن کی تلاش جاری ہے۔

70 سالہ خاتون نے کوچ سے چھلانگ لگانے پر شدید زخمی ہو گئی اور زخموں کی تاب نہ لاتے ہوئے جاں بحق ہو گئی۔

وزارت ریلوے نے واقعے کا سخت نوٹس لیتے ہوئے تحقیقات کا حکم دے دیا۔اس ضمن میں فیڈرل گورنمنٹ انسپلٹر آف ریلویز کی سربراہی میں ٹیم جائے وقوعہ کے لیے روانہ ہو چکی ہے۔تحقیقات کے مکمل ہوتے ہی میڈیا کو بھی آگاہ کیا جائے گا۔ڈی ایس پی سکھر ،ڈی سی او سکھر اور دیگر ریلوے افسران موقع پر موجود رہے اور صورتحال کی نگرانی اور وزارت میں رپورٹ کرتے رہے۔کراچی ایکسپریس سے متاثرہ کوچ کو علیحدہ کرنے کے بعد پونے سات بجے منزل کی طرف روانہ کر دیا گیا۔دوسری جانب سوشل میڈیا پر ٹرین میں آتشزدگی کی ویڈیوز بھی وائرل ہیں۔ماضی میں ٹرینوں کو کئی حادثات پیش آ چکے ہیں جس کے نتیجے میں قیمتی جانوں کا ضیاع ہوتا ہے۔