لاہور(نیوزڈیسک) عدالت نے چئیرمین پی ٹی آئی عمران خان کو تمام مقدمات میں شامل تفتیش ہونے کا حکم دے دیا۔ لاہور ہائیکورٹ میں عمران خان کے خلاف مقدمات کے اخراج کی درخواست پر سماعت ہوئی۔ جسٹس علی باقر نجفی کی سربراہی میں 5 رکنی لارجر بنچ نے درخواست پر سماعت کی۔ لارجر بنچ میں جسٹس مس عالیہ نیلم، جسٹس طارق سلیم شیخ، جسٹس انوارالحق پنوں اور جسٹس امجد رفیق شامل ہیں۔
لاہور ہائیکورٹ نے عمران خان کو تمام مقدمات میں شامل تفتیش ہونے کا حکم دیا۔بینچ نے ہدایت کی کہ عمران خان جمعے کے روز 2 بجے پولیس تفتیش جوائن کریں۔پنجاب حکومت تفتیش کرکے 8 مئی تک رپورٹ عدالت میں جمع کرائے۔ لاہور ہائیکورٹ نے درخواست کی سماعت پیر تک ملتوی کر دی۔خیال رہے کہ عمران خان کیخلاف مقدمات کے اخراج کیلئے درخواست سماعت کیلئے مقرر کی گئی تھی۔

درخواست میں وفاقی، پنجاب حکومت، چیف سیکرٹری، ایڈیشنل چیف سیکرٹری ہوم، آئی جی پولیس کو فریق بنایا گیا ، درخواست میں موقف اختیار کیا گیاکہ سیاسی رنجش پر ان کے اور پی ٹی آئی کیخلاف 121 ایف آئی آر درج کی جا چکی ہیں، انہیں پکڑنے کی کوششں ان کے جینے کے حق کی خلاف ورزی ہے، ایک وقوعہ کی بار بار ایف آئی آر درج کرنے سے ان کے بنیادی حقوق کی خلاف ورزی ہورہی ہے، استدعا ہے کہ عدالت ایک ہی نوعیت کی ایف آئی آر درج کرنے سے روکنے کا حکم دے، عدالت تمام فوجداری کارروائی کا جامع ریکارڈ فراہم کرنے اور پیشگی اطلاع کے بغیر کوئی مقدمہ درج کرنے سے روکنے کا حکم دے۔
دوسری جانب جوڈیشل کمپلیکس توڑ پھوڑ کیس میں انسداد دہشت گردی عدالت نے عمران خان سمیت مقدمے میں نامزد تمام رہنماؤں کی عبوری ضمانت میں 17 مئی تک توسیع کر دی۔ پی ٹی آئی رہنماؤں کیخلاف تھانہ گولڑہ اور سی ٹی ڈی میں مقدمات درج ہیں۔