اسلام آباد (نیوزڈیسک) چیئرمین پی ٹی آئی عمران خان نے حکومت کے خلاف فیصلہ کن حکمت عملی کی تیاری شروع کردی ہے۔ اے آروائی نیوز کے مطابق چیئرمین پی ٹی آئی عمران خان نے سینئر صحافیوں اور اینکرپرسنز سے ملاقات میں گفتگو کرتے ہوئے کہا کہ حکومت آئین پر عملدرآمد نہیں کرنا چاہتی، عوام کو لے کر حکومت کے خلاف باہر نکلیں گے۔
آئین اور سپریم کورٹ کے فیصلوں پر عمل کیلئے چند روز انتظار کریں گے۔ مزید برآں ٹویٹر پر پی ٹی آئی میڈیا سیل کے مطابق پاکستان تحریک انصاف نے 14 مئی کو اسلام آباد میں آئین، چیف جسٹس اور سپریم کورٹ سے اظہار یکجہتی کے لئے 101 مقامات پر بڑے عوامی اجتماعات کے انعقاد کا فیصلہ کرلیا ہے۔ تحریک انصاف اسلام آباد کے صدر علی نواز اعوان نے اسلام آباد انتظامیہ کو بذریعہ خط باضابطہ طور پر آگاہ کردیا ہے، تحریک انصاف 14مئی بروز اتوار شام 4 بجے آئین، چیف جسٹس اور عدلیہ اظہار یکجہتی کے لئے 101 مقامات پر پرامن اجتماعات منعقد کریگی۔

دستورِمملکت اپنے آرٹیکل 15،16،17 اور 19 کے ذریعے شہریوں کو نقل وحرکت،اجتماع، اظہار اور ایسوسی ایشن کے بنیادی حقوق فراہم کرتا ہے۔ سپریم کورٹ اور ہائی کورٹس اپنے فیصلوں میں سول انتظامیہ کو عوام کے بنیادی حقوق متاثر کئے بغیر امور سرانجام دینے کا پابند کرچکی ہیں۔ تحریک انصاف کی درخواست پر اسلام آباد ہائی کورٹ نے حال ہی میں بنیادی حقوق کے حوالے سے واضح ہدایات دیں، پاکستان تحریک انصاف اسلام آباد گزشتہ ایک سال میں کم وبیش 150 بڑی پرامن سیاسی سرگرمیاں کرچکی ہے۔
علی نواز اعوان نے کہا کہ تحریک انصاف اسلام آباد کی جانب سے کی گئی ان 150 بڑی سرگرمیوں کے نتیجے میں دارالحکومت میں ایک گملہ تک نہیں ٹوٹا، تحریک انصاف اسلام آباد آئین، چیف جسٹس اور عدلیہ سے اظہاریکجہتی کا مکمل حق رکھتی ہے، 14مئی بروز اتوار شام 4 بجے چئیرمین عمران خان کی کال پر 101 مقامات پر پرامن اجتماعات منعقد کرینگے۔ اسلام آباد انتظامیہ آئین کی بالادستی کے پیش نظر ان عوامی اجتماعات کی سکیورٹی سمیت دیگر ضروری انتظامات یقینی بنائے۔