اسلام آباد (نیوزڈیسک) روس سے تیل پاکستان آنے پر پٹرولیم مصنوعات کی قیمتوں میں کمی کے حوالے سے قیاس آرائیاں جاری ہیں اور یہ بھی کہا جارہا ہے کہ روس سے تیل آنے کے بعد پاکستان میں پٹرول کی قیمت میں سو روپے کمی ہو جائے گی۔اسی حوالے سے وفاقی وزیر احسن اقبال نے وائس آف امریکہ کو دیئے گئے انٹرویو میں کہا کہ پٹرول کی قیمت میں سو روپے تک کمی،اتنا زیادہ فرق تو نہیں پڑے گا لیکن پٹرول کی قیمت ضرور کم ہوگی۔
انہوں نے کہا ابھی روسی تیل کی ایک کم مقدار پاکستان پہنچ رہی ہے۔چھ ماہ یا سال بعد زیادہ تیل پاکستان آئے گا تو اس سے پاکستان میں پٹرول کی قیمت میں کمی کرنے میں مدد ملے گی۔احسن اقبال سے سوال کیا گیا تھا کہ روس سے تیل لانے کے بعد پاکستان میں پٹرول کی قیمت میں 100 روپے کمی کی جائے گی جس کی انہوں نے تردید کردی۔

قبل ازیں وزیرمملکت پیٹرولیم مصدق ملک نے کہا ہے کہ روس سے رعایتی قیمت پر تیل مل رہا ہے اور اگلے 15 سے 20 روز میں پاکستان میں روسی تیل ہوگا۔

ایک انٹرویو میں وزیر مملکت نے کہا کہ سیاسی جماعتوں کے درمیان تنازعات کو تھمنا ہوگا، رکنا ہوگا، ایسے تو کریانہ کی دکان نہیں چلتیں، آپ ملک کیسے چلا سکتے ہیں۔ مصدق ملک نے کہا کہ گیس پر 1700 ارب روپے کا گردشی قرضہ تھا، ہم نے گیس پر گردشی قرضے کو صفر کردیا ،ایل این جی پر بھی گردشی قرضے کو صفر کردیں گے۔انہوں نے کہا کہ تاریخ میں پہلی بار دو روسی وزیر 86 رکنی وفد کے ہمراہ پاکستان آئے، روس سے رعایتی قیمت پر تیل مل رہا ہے اور اگلے 15 سے 20 روز میں پاکستان میں روسی تیل ہوگا۔وزیر مملکت نے کہا کہ حکومت کی جانب سے اہم فیصلے کیے جارہے ہیں اور حالات کو بہتر کرنے کیلئے مشکل فیصلے کیے جارہے ہیں، آگے بڑھنے کیلئے ہمیں چھوٹے کاروبارکرنیوالوں کو پروموٹ کرنا ہے۔۔