اسلام آباد (نیوزڈیسک) وزیراعظم شہباز شریف (کل) ہفتہ کو ترکیہ کے نو منتخب صدر رجب طیب ایردوان کی حلف بر داری تقریب میں شریک ہونگے ۔ذرائع کے مطابق ترکیہ کے نو منتخب صدر جب طیب ایردوان کی حلف برداری تقریب (آج)ہفتہ کوہوگی ،وزیراعظم ترک صدر کی تقریب حلف برداری میں شرکت کریں گے۔ذرائع کے مطابق وزیراعظم کا دورہ پاکستان اور ترکیہ کے مابین گہرے برادرانہ تعلقات کا اعادہ ہوگا۔
ذرائع کے مطابق وزیراعظم محمد شہباز شریف رجب طیب ایردوان کو حکومت اور پاکستانی عوام کی جانب سے مبارکباد پیش کریں گے۔ذرائع کے مطابق وزیر اعظم صدر ایردوان کو اسلام آباد میں اعلیٰ سطحی سٹریٹجک کوآپریشن کونسل میں شرکت کی دعوت دیں گے۔سفارتی حکام کے مطابق پاکستان اور ترکیہ کے تعلقات مشترکہ عقائد، ثقافت اور تاریخ کی مماثلت پر مبنی ہیں، تعلقات باہمی اعتماد اور علاقائی اور عالمی معاملات پر نظریات کی ہم آہنگی سے مضبوط ہوتے ہیں، اعلیٰ قیادت کی سطح پر متعدد تبادلے دونوں ممالک کے مابین گہرے تعلق کے نمایاں پہلو ہیں۔