لکی مروت (نیوزڈیسک) بنوں اور لکی مروت میں طوفانی بارش سے تباہی، درجنوں افراد جاں بحق ہو گئے۔ ریسکیو حکام کے مطابق دیواریں اور چھتیں گرنے سے 100 سے زائد زخمی بھی ہوگئے، جنہیں ہسپتال منتقل کر دیا گیا۔ تیز آندھی اور بارش سے ملک میں دو ہفتے سے جاری گرمی کا زور ٹوٹ گیا۔ اسلام آباد، لاہور، راولپنڈی، بنوں، اٹک، شیخوپورہ اور شاہ کوٹ میں بارش ہوئی۔
شکرگڑھ، ہنگو، لکی مروت، ٹانک، سوات، مینگورہ، مری اور شانگلہ میں بھی تیز بارش ریکارڈ کی گئی۔ قصور، بھکر، پیر محل، ننکانہ صاحب اور دیگر علاقوں میں آندھی کے ساتھ بارش ہوئی۔ آندھی اور طوفانی بارش سے متعدد اضلاع میں بجلی کے بیشتر فیڈر ٹرپ کر گئے۔ آندھی اور طوفانی بارش سے مختلف علاقوں میں دیوار اور چھتیں گرنے کے واقعات پیش آئے۔

بنوں اور لکی مروت میں دیواریں اور چھتیں گرنے سے درجنوں افراد جاں بحق جبکہ 100 سے زائد زخمی ہوگئے۔ ریسکیو ذرائع کے مطابق ہلاکتیں دیواریں، چھتیں اور درخت گرنے سے ہوئیں، مزید ہلاکتوں کے خدشہ کے باعث اسپتالوں میں ایمرجنسی نافذ کر دی گئی، جاں بحق اور زخمیوں میں بچوں کی تعداد زیادہ ہے۔ ڈیرہ اسماعیل خان سے بھی طوفان کے باعث ایک شخص کے جاں بحق جبکہ 15 زخمی ہونے کی اطلاعات ہیں، زخمیوں کو ابتدائی طبی امداد کیلئے ڈسٹرکٹ ہیڈ کوارٹر ہسپتال منتقل کیا گیا ہے، طوفان کے بعد ڈیرہ اسماعیل خان کے تمام ہسپتالوں میں ایمرجنسی نافذ کر دی گئی ہے، داؤد خیل میں تیز آندھی سے متعدد درخت جڑوں سے اکھڑ گئے، دیواریں گرنے سے دو خواتین سمیت 3 زخمی ہوگئے۔
یہ بھی پڑھیں: بارش کی پیشگوئی: لاہور میں واسا کو الرٹ رہنے کی ہدایات جاری ڈی جی ریسکیو 1122 نے بتایا ہے کہ آندھی اور طوفان کے باعث جاں بحق افراد کی تعداد 15 ہوگئی ہے، زخمیوں کی تعداد 25 سے زائد ہے، جاں بحق افراد میں بچے اور خواتین شامل ہیں، ریسکیو 1122 کی امدادی کارروائیاں کرک، بنوں اور لکی مروت میں جاری ہیں، جن علاقوں میں گھروں کی چھتیں اور دیواریں گرنے کے واقعات سامنے آئے ہیں وہاں ریسکیو ٹیموں کو الرٹ کر دیا گیا ہے۔
نگران وزیر اعلیٰ خیبرپختونخوا محمد اعظم خان نے طوفانی بارش میں جانی و مالی نقصانات پر افسوس اور جاں بحق افراد کے لواحقین سے تعزیت اور دلی ہمدردی کا اظہار کرتے ہوئے کہا کہ متاثرین کے دکھ درد میں برابر کے شریک ہیں، چیف سیکرٹری، متعلقہ ڈویژنل اور ڈسٹرکٹ انتظامیہ متاثرہ علاقوں میں امدادی کارروائیاں بغیر کسی تاخیر کے فوری شروع کی جائیں۔
خیبرپختونخوا کے وزیر بیرسٹر فیروز جمال شاہ نے کہا ہے کہ صوبے کے مختلف علاقوں میں آندھی و طوفانی بارش ہوئی ہے، مختلف اضلاع سے 15 افراد کے جاں بحق ہونے کی اطلاعات موصول ہوئی ہیں، زیادہ متاثرہ اضلاع بنوں، لکی مروت اور کرک کی انتظامیہ سے رابطے میں ہیں، متاثرہ اضلاع کے ہسپتالوں میں ہائی الرٹ جاری کر دیا ہے، آندھی و طوفانی بارش سے نقصانات کا جائزہ لیا جا رہا ہے۔
پنجاب کے علاقے نورپور تھل میں تیز ہواؤں کے باعث دیوار گرنے سے 3 بہنیں ملبے تلے دب کر جاں بحق ہو گئیں، جاں بحق ہونے والوں میں 13 سالہ ستارہ بی بی، 8 سالہ منظر فاطمہ اور 3 سالہ کشف بی بی شامل ہیں، وزیر آباد میں بھی دیوار گرنے سے ایک شخص جان کی بازی ہار گیا جبکہ 2 بچے زخمی ہوئے ہیں، تیز ہوا کے باعث دارہ صلے شاہ میں 300 سال پرانا درخت جڑ سے اکھڑ گیا۔
گوجرانوالہ میں طوفانی بارش کے باعث مختلف حادثات میں 10 افراد زخمی ہوگئے، ایمن آباد روڈ پر سٹیل فیکٹری کا شیڈ مزدوروں پر گر گیا جس کی وجہ سے وہاں کام کرنے والے 3 مزدور زخمی ہو گئے جنہیں ہسپتال منتقل کر دیا گیا، دھلے اور گوندانوالہ میں چھتیں گرنے کے دو واقعات میں 7 افراد زخمی ہوئے ہیں، دھلے میں چھت گرنے سے 3 جبکہ گوندانوالہ گاؤں میں کمرے کی چھت گرنے سے 4 افراد زخمی ہوئے۔