اسلام آباد (نیوزڈیسک) صدر مملکت نے جسٹس قاضی فائز عیسٰی کی بطور چیف جسٹس پاکستان تعیناتی کی منظوری دے دی۔ میڈیا رپورٹس کے مطابق صدر مملکت عارف علوی نے چیف جسٹس کی تعیناتی کی منظوری آئین کے آرٹیکل 175 اے 3 کے تحت دی۔ جسٹس قاضی فائز عیسٰی کی تعیناتی کا اطلاق 17 ستمبر 2023ء سے چیف جسٹس عمر عطاء بندیال کی ریٹائرمنٹ پر ہو گا۔

موجودہ چیف جسٹس پاکستان عمر عطا بندیال 16 ستمبر 2023ء کو ریٹائرڈ ہو جائیں گے،صدر مملکت جسٹس قاضی فائز عیسٰی سے 17 ستمبر 2023ء کو عہدے کا حلف لیں گے۔ جسٹس قاضی فائز عیسٰی کی بطور چیف جسٹس پاکستان تعیناتی کا نوٹیفیکشن بھی جاری کر دیا گیا ہے،وزارتِ قانون نے تعیناتی کا نوٹیفیکشن جاری کیا۔ جسٹس قاضی فائز عیسٰی سپریم کورٹ کے سنیئر ترین جج ہیں،جسٹس قاضی فائز عیسٰی 29 ویں چیف جسٹس پاکستان ہوں گے۔ یاد رہے کہ جسٹس عمر عطا بندیال نے بطورِ چیف جسٹس 2 فروری 2022ء کو عہدے کا حلف اٹھایا تھا۔