لاہور (نیوزڈیسک) وزیراعظم کا کہنا ہے کہ مدت پوری ہوتے ہی حکومت چھوڑ دیں گے،انتخابات کی تاریخ اور انتخابات کرانا الیکشن کمیشن کا کام ہے۔ تفصیلات کے مطابق وزیراعظم شہباز شریف نے پریس کانفرنس کرتے ہوئے کہا ہے کہ قرض ہمیں مجبوری میں لینا پڑ رہا ہے،خدا کریں ہم دوبارہ آئی ایم ایف کے پاس نہ جائیں۔ ملک ڈیفالٹ کر جاتا تو میں اور نواز شریف خود کو معاف نہ کرتے،اللہ تعالٰی نے کرم کیا اور ملک ڈیفالٹ ہونے سے بچ گیا۔
انہوں نے کہا کہ سعودی عرب نے 2 ارب ڈالر اور یو اے ای نے 1 ارب ڈالر دینے کا وعدہ کیا،چین کو 5 ارب ڈالر کے قرضے واپس کیے جو دوست ملک نے دوبارہ دے دئیے۔ وزیراعظم کا 9 مئی کے واقعات پر بات کرتے کہنا تھا کہ اس طرح کے واقعات پاکستان کو تباہ کرنے کی سازش تھی،9 مئی کی سازش میں اندر اور باہر کے دشمن شامل تھے۔

فوجی اداروں پر حملے کے کیس آرمی ایکٹ کے تحت چلیں گے،جبکہ سول اداروں پر حملے کے کیس سول عدالتوں میں چلیں گے۔

9 مئی کے ملزمان کو قانون کے مطابق سزائیں ملیں گی۔ شہباز شریف نے عمران خان پر تنقید کرتے ہوئے کہا کہ چیئرمین پی ٹی آئی نے ملک میں ایک اینٹ نہیں لگائی،سابق حکومت نے ملکی مفاد کو نقصان پہنچایا۔ نوازشریف نے کبھی بالٹی سر پر نہیں پہنی، در در کی ٹھوکریں نواز شریف نے کھائی،عمران خان نے نہیں۔نواز شریف نے 100 پیشاں بھگتیں،چیئرمین پی ٹی آئی نے توشہ خانہ میں جعلی رسیدیں پیش کی گئیں۔
انکا کہنا تھا کہ بڑی طاقتوں سے کسی صورت ناراضگی مول نہیں لے سکتے،بڑی طاقتوں سے تعلقات بہتر کرنے کی کوشش کر رہے ہیں۔سختیاں ضرور ہوں گی لیکن اشرافیہ پر ہوں گی،اشرافیہ کو قربانی دینا پڑے گی۔ وزیراعظم نے واضح کرتے ہوئے کہا کہ مدت پوری ہوتے ہی حکومت چھوڑ دیں گے،انتخابات کی تاریخ اور انتخابات کرانا الیکشن کمیشن کا کام ہے۔