لاہور(نیوزڈیسک) سابق وزیر داخلہ شیخ رشید احمد نے کہا ہے کہ صرف30 دن کا کھیل باقی ہے لوگ ایک مہینہ مہنگائی اورمشکلات کا مزید مقابلہ کریں ،جس روز اسمبلیاں تحلیل ہوں گی اسی صبح نئی سیاست طلوع ہوگی ،زمین پر اکڑ کر چلنے والے چادر اور چاردیواری کو روندنے والے زمین بوس ہو جائیں گے ،جیل کاگیٹ ٹوٹے گابیگناہ لوگ چھوٹیں گے اور3مرتبہ خزانے کولوٹنے والے اورسرے محل بنانے والے ان بیگناہ لوگوں کی جگہ لیں گے۔
ٹوئٹر پر جاری اپنے بیان میں انہوں نے کہا کہ آئی ایم ایف حکومت اور اس کے وزیرخزانہ پراعتبار نہیں کرتا اسے لیے دوسروں سے شورٹی لینے ان کے گھر گئے ہیں ،دس کروڑ لوگ خطے غربت کی لکیر سے نیچے آ گئے ہیں اور دوکروڑ لوگ بیروزگار ہو گئے ہیں یہ پندرہ مہینے کی حکومت کا کارنامہ ہے ،30دنوں میں پی ڈی ایم میں کھینچا تانی ہو گی رسہ کشی ہوگی جوڈو کراٹے ہوں گے اور بٹوارہ ہوگا،بنکاک کے شولے ہوں گے اور بغداد کی راتیں ہوں گی ۔

انہوںنے کہا کہ صاف اور شفاف الیکشن ہی ملک کو مسائل سے نجات دلائیں گے ورنہ کشت وخون ہوگا ،سیاسی استحکام کے بغیر معاشی استحکام نہیں آ سکتا ،الیکشن کروانے ہوں گے ،زرداری اور بلاول سیاسی منظر نامے سے غائب ہیں ،معلوم نہیں یہ آئی ایم ایف کے معاہدے کے ساتھ ہیں یا نہیں ہیں ،دو تہائی اکثریت کے بغیر اسمبلی میں بنائے گئے قانون کی کوئی حیثیت نہیں ۔
انہوںنے کہا کہ نواز شریف کی سزا اور اس کی واپسی بھی دو تہائی کی آئینی ترمیم سے مشروط ہے ،جب ذرائع ابلاغ کوپابند سلاسل کردیا جاتا ہے تو ملک افواہوں کی لپیٹ میں آجاتا ہے ،جو قرضہ دے رہے ہیں ان کو قرضوں کی واپسی کی گرنٹی بھی چاہیے ورنہ ڈیفالٹ کی تلوارلٹک رہی ہے ،ہم پہلے ہی عالمی برادری سے تنہا ہوتے جا رہے ہیں وہ کہہ رہے ہیں کہ سیاسی استحکام پیدا کرو ،ان حالات میں یورپی یونین جی ایس پی پلس سٹیٹس بھی واپس لے سکتی ہے۔