اٹک (نیوزڈیسک) آئی جی جیل خانہ جات نے کہا ہے کہ عمران خان کو تمام ضروری سہولیات دی جا رہی ہیں۔ انہوں نے کہا کہ ائیر کولر، چارپائی، پنکھا اور بیڈ میٹرس ، تکیہ ، ٹیبل اور دو کُرسیاں دی گئی ہیں۔ فاروق نذیر نے بتایا کہ سابق وزیر اعظم کی بارک کی صفائی ستھرائی کا مکمل انتظام کیا گیا ہے، تمام ضروری طبی سہولتیں بھی فراہم کی جا رہی ہیں۔
ان کا مزید کہنا تھا کہ قانون کے مطابق ڈاکٹرز کی نگرانی میں خوراک بھی مہیا کی جا رہی ہے، جیل مینوئل اور قانون کے مطابق تمام ضروری سہولیات دی ہیں جبکہ وکیل اور فیملی کو جیل مینوئل کے مطابق ملاقات کی سہولت بھی حاصل ہے۔ اپنے ایک بیان میں انہوں نے کہا کہ عمران خان کو سکیورٹی وجوہات کی بناء پرجیل میں علیحدہ پورشن میں رکھا گیا ہے ۔

خیال رہے کہ محکمہ جیل پنجاب کی جانب سے ایسے وقت پر ردعمل کا اظہار کیا گیا ہے جب حالیہ روز عمران خان کے وکیل نے چیئرمین پی ٹی آئی سے ملاقات کے بعد میڈیا سے بات کرتے ہوئے دعویٰ کیا تھا کہ ’’سابق وزیراعظم کو سی کلاس میں رکھا گیا ہے جہاں صفائی کا ناقص انتظام ہے، دن میں مکھیاں اور رات کے وقت حوالات میں کیڑے اور دن میں مکھیاں ہوتی ہیں‘‘۔

اس ضمن میں محکمہ جیل پنجاب کے ترجمان نے اپنے ردعمل کا اظہار کیا ہے۔ انہوں نے کہا کہ چیئرمین تحریک انصاف عمران خان کے حوالے سے الیکٹرانک، پرنٹ اور سوشل میڈیا پر زیر گردش خبریں ’’حقائق کے برعکس اور بے بنیاد‘‘ ہیں۔ انہوں نے کہا کہ عمران خان عدالت سے سزایافتہ ہونے کے بعد ڈسٹرکٹ جیل اٹک میں اپنے ایام اسیری بسر کر رہے ہیں اور انہیں سیکورٹی وجوہات کی بنا پر جیل میں علیحدہ پورشن میں رکھا گیا ہے۔ ترجمان محکمہ جیل پنجاب کے مطابق چیئرمین تحریک انصاف کو تمام ضروری طبی سہولیات بھی فراہم کی گئی ہی،۔ جیل مینوئل کے مطابق ڈاکٹرز کی نگرانی میں خوراک بھی مہیا کی جا رہی ہے جبکہ وکیل اور فیملی کو جیل مینوئل کے مطابق ملاقات کی سہولت بھی حاصل ہے۔