اسلام آباد (نیوزڈیسک) جماعت اسلامی پاکستان کے سینیٹر مشتاق احمد خان نے کہا ہے کہ بجلی کی چوری کو دہشتگردی کے برابر جرم قرار دےکر کھلے عام سزائیں دی جائیں، بجلی کے بلوں میں تمام ظالمانہ ٹیکس ختم کرو، ججز جرنیل افسرشاہی واپڈا ملازمین اور پارلیمنٹیرینز کیلئے مفت بجلی مفت نہ دو۔ انہوں نے مائیکروبلاگنگ ویب سائٹ ایکس پر نگران وزیراعظم سے مخاطب ہوتے پوئے کہا کہ عوام اب بھپر گئے ہیں، کراچی سے چترال تک مظلوموں کو بجلی کے بلوں / واپڈا نے اشرافیہ کیخلاف متحد کردیا ہے، کل کے اجلاس میں ان چار کاموں کا فیصلہ اور فوری عملدرآمد کرلو، ورنہ دانشورانہ گفتگو اور بھاری بھر کم الفاظ سے عوام کا پیٹ بھرنے والا نہیں۔
سینیٹر مشتاق احمد خان نے کہا کہ بجلی کے بلوں میں تمام ظالمانہ ٹیکس ختم کرو، مفت بجلی بند کردو، ججز، جرنیل، افسرشاہی، واپڈا ملازمین، پارلیمنٹیرینز کسی کو بھی ایک یونٹ بجلی مفت نہ دو۔

آئی پی پیز سے فراڈ معاہدے ختم کرو اور ان کے مالکان کے اوپر ایف آئی آر درج کرکے ان کو گرفتار کرو۔ ملک میں فرنس آئل اور امپورٹڈ کوئلہ سے بجلی کی تیاری پر پابندی لگا دو۔

بجلی کی چوری جو محکمہ واپڈا کی سہولتکاری سے ہوتی ہے اس کو دہشتگردی کے برابر جرم قرار دیکر کھلے عام سزائیں دو۔ یاد رہے نگران وزیراعظم انوارالحق کاکڑ نے مائیکروبلاگنگ ویب سائٹ ایکس پر کہا کہ بجلی کے بھاری بِلوں کے معاملے پر میں نے کل وزیر اعظم ہاؤس میں ہنگامی اجلاس طلب کر لیا ہے۔ اجلاس میں وزارت بجلی اور تقسیم کار کمپنیوں سے بریفنگ لی جائے گی اور صارفین کو بجلی کے بِلوں کے حوالے سے زیادہ سے زیادہ ریلیف دینے کے حوالے سے مشاورت کی جائے گی۔