اسلام آباد (نیوزڈیسک) ترجمان پی ٹی آئی نعیم حیدر پنجوتھہ نے دعوی کیا ہے کہ سائفر اصل حالت میں وزارت خارجہ میں موجود ہے۔ انہوں نے نجی ٹی وی چینل ہم نیوز کے پروگرام میں گفتگو کرتے ہوئے کہا کہ چیئرمین پی ٹی آئی کی ضمانت سوموار کو ہو جائے گی، ہم نے کہا ریلیف نہیں چاہیے، قانون کے مطابق فیصلہ دیں۔ انہوں نے انتخابات کے حوالے سے بات کرتے ہوئے کہا کہ 90روز کے اندر انتخابات پر سپریم کورٹ سے رجوع کرنے کا فیصلہ ہوا ہے، چیئرمین پی ٹی آئی کی ہدایت پر وزیراعظم کو بھی خط لکھا ہے۔
ادھر چیئرمین پی ٹی آئی نے ایف آئی اے تحقیقات میں سائفر گمشدگی کا اعتراف کرلیا ہے، ایف آئی اے ٹیم نے سابق وزیراعظم سے ایک گھنٹہ پوچھ گچھ کی اور چیئرمین پی ٹی آئی کے بیانات قلمبند کر لئے ہیں۔

ہم نیوز کے مطابق ایف آئی اے کی تین رکنی ٹیم نے آج اٹک جیل میں جاکر چیئرمین پی ٹی آئی سے سائفر کیس سے متعلق انویسٹی گیشن کی۔ ایف آئی اے ٹیم نے جیل میں سابق وزیراعظم سے ایک گھنٹہ تک سائفر گمشدگی سے متعلق پوچھ گچھ کی۔

بتایا گیا ہے کہ چیئرمین پی ٹی آئی نے ایف آئی اے کی ٹیم کے سامنے خفیہ سائفر مراسلہ گم ہو جانے کا ایک بار پھراعتراف کرلیا ہے۔ جس پر ایف آئی اے ان کا بیان قلمبند کرلیا ہے۔ تحقیقاتی ٹیم نے چیئرمین پی ٹی آئی کے بیانات قلمبند کیے ہیں ۔ اٹک جیل میں چیئرمین پی ٹی آئی سے تحقیقات کرنے والی ایف آئی اے کی 3 رکنی ٹیم کی قیادت ڈپٹی ڈائریکٹر ایاز کرر ہے تھے۔
دوسری جانب شاہ محمود قریشی نے اسلام آباد ہائیکورٹ سے رجوع کر لیا۔ آفیشل سیکرٹ ایکٹ کے تحت سائفر کیس میں وائس چیئرمین پی ٹی آئی شاہ محمود قریشی نے اسلام آباد ہائیکورٹ میں درخواست دائر کر دی ہے،شاہ محمود قریشی نے جسمانی ریمانڈ کے 3 آرڈرز کیخلاف درخواست دائر کی۔ درخواست میں وفاق اور سیکرٹری داخلہ کو فریق بنایا گیا جس میں مؤقف اختیار کیا گیا کہ وفاقی حکومت کی ملی بھگت سے میرے خلاف مقدمہ درج ہوا،آفیشل سیکرٹ ایکٹ کے تحت سیاسی انتقام کا نشانہ بنانے کیلئے مقدمہ درج کیا گیا۔