کوئٹہ (نیوزڈیسک) صوبہ بلوچستان کے ضلع قلعہ عبداللہ میں سکیورٹی فورسز نے 2016ء کے بعد انسداد منشیات کی سب سے بڑی کارروائی کرتے ہوئے 6 ٹن ایفیڑرین تلف، منشیات کے 48 کمپاؤنڈز مسمار اور منشیات پروسیسنگ کی 28 مشینیں تباہ کر دیں، مقامی لوگوں نے قلعہ عبداللہ اور گلستان میں منشیات فروشوں کے خلاف اس کاروائی کا خیر مقدم اور سکیورٹی اداروں کا شکریہ ادا کیا۔
تفصیلات کے مطابق پاک فوج اور قانون نافذ کرنے والے دیگر اداروں کے تعاون سے ملکی سطح پر اسمگلروں کے خلاف بڑے پیمانے پر کریک ڈاؤن جاری ہے، اس سلسلے میں بلوچستان کے ضلع قلعہ عبداللہ میں منشیات کے خلاف تاریخی کامیابی حاصل کرتے ہوئے ایف سی بلوچستان (نارتھ)، اینٹی نارکوٹکس فورس، لیویز اور قانون نافذ کرنے والے دیگر اداروں نے مشترکہ آپریشن کیا۔

بتایا گیا ہے کہ یہ آپریشن 2016 کے بعد انسداد منشیات کی سب سے بڑی کارروائی ہے، اِس تاریخی آپریشن کو کامیابی سے مکمل کرنے کے لئے پہلے جرگے کا انعقاد کیا گیا اور متعلقہ لوگوں کو وارننگ دی گئی، جرگے کے انعقاد کے بعد مشترکہ طور پر بڑے پیمانے پر اسمگلروں کے خلاف آپریشن کا باقاعدہ آغاز ہوا، آپریشن کے دوران منشیات کی پیداوار، منشیات ذخیرہ کرنے والی جگہوں اور قیمتی مشینوں کو تلف کیا گیا۔
معلوم ہوا ہے کہ آپریشن میں اب تک کل 42 اہداف کے خلاف کارروائی کی جاچکی ہے، آپریشن میں منشیات کے خفیہ گودام اور منشیات افزائش کی کئی ایکڑ فصلوں کی برآمدگی ہوئی، 6 ٹن ایفیڑرین تلف، 48 منشیات کے کمپاؤنڈز کو مسمار کردیا گیا، 70 ایکڑز منشیات کی فصلیں تلف کردی گئیں اور منشیات پروسیسنگ کی 28 مشینوں کو تباہ کر دیا گیا، بڑے پیمانے پر کریک ڈاؤن میں ٹوٹل 11 افراد کو زیر حراست لیا گیا۔
بتایا جاتا ہے کہ منشیات کے اس اڈے کی حفاظت پر 500 سے 600 مصلح غیر قانونی طور پر مقیم افغانی مامور تھے، آپریشن میں کروڑوں مالیت کی منشیات اور اس کی تیاری میں استعمال ہونے والا ممنوعہ کیمیائی مواد بھی ضبط کیا گیا، آپریشن کے دوران 1100 کلو چرس، 94 کلوگرام ایفیڈرین، 16.2 کلو گرام آئس اور 1090 لیٹر ایچ سی ایل بھی برآمد کر لئے گئے، منشیات کی کُل مالیت 7 کروڑ 21 لاکھ 87 ہزار 950 روپے ہے، اس کاروائی میں منشیات کے تمام ٹھکانوں کو تباہ کیا گیا۔